Mas di ocho morto despues di eksploshon di outo – bòm

49
Vehíkulo ku a keda, ainda na kandela, na e sitio di e eksploshon.

BOGOTÁ – Un total di ocho persona a pèrdè nan bida i otro vários a resultá heridá den oranan di ayera na Bogotá, na momentu ku un outo – bòm a eksplotá na un kaminda di stashoná vehíkulo di un skol di polis.

Segun un komunikado di e ministerio, e eksploshon aki te ainda a laga saldo di ocho morto i dies herido i pa e mesun motibu aki e presidente kolombiano, Ivan Duque, a kanselá un konseho di seguridat ku mester a keda realisá den oranan di ayera na Quibdó, kapital di e departamento di Chocó i a regresá bèk pa Bogotá.

E presidente a indiká via di su kuenta di Twitter, ku e tabata rumbo bèk pa Bogotá ku un grupo militar debí na e akto ‘terorista miserabel’ ku a keda kometé kontra agentenan polisial di e pais.

Outoridatnan no a duna masha informashon relashoná ku e vehíkulo òf ku e bòm ku a keda ingresá di un forma òf otro den sede di e skol, unda ta forma agentenan polisial kolombiano. Esaki ta situá na a parti sùit di Bogotá.

Duque ademas a indiká, e huntu ku tur su gabinete i tambe e pueblo kolombiano, ta rechasá terorismo i a indiká ku nan ta pará uní pa asina enfrentá esaki. El a sigui indiká ku Colombia ta haña esaki tristu pero sigur no ta dobla kontra violensia.

E promé imágennan di e lugá, ta mustra algun pida heru kompletamente destrosá i na kandela, di loke a sobra di e vehíkulo. Esaki na algun kaya interno di e skol polisial i algun palunan di mata parti na dos, debí na forsa di e eksploshon.

Mas aleu a indiká ku mesora a pone protokòlnan di investigashon den marcha pa asina logra yega na esnan responsabel di e echo terorista aki. Miéntras tantu, e heridonan a keda transportá i ta risibí atenshon médiko na Hospital Policlinica di Outoridatnan Polisial Nashonal.

Unidatnan di kuerpo di bombero di Bogotá a yega na e sitio di e atentado pa asina yuda víktimanan ku, segun medionan di komunikashon di e pais, ta personanan ku tabata sigui kurso di polis na e institushon.