Promé detenshon di sospechoso den atentado terorista

79
Personanan ku a presensiá e suseso den oranan di djaweps último.

BOGOTA – Outoridatnan kolombiano a detené un hòmber ku supuestamente tabata vinkulá ku e atentado registrá den oranan di djaweps último na e Skol General Santander di Bogotá, kua a laga saldo di 21 morto i 68 herido.

Segun e fuente, den oranan di djaweps anochi a lansa un operativo entre Ehérsito, Fiskalia i outoridatnan polisial pa asina por logra kapturá responsabelnan di e atake terorista.

Den e bario di Laches, na sentro di Bogotá, a detené e hòmber Ricardo Andrés Carvajal, un di e presunto sospechosonan, ku a keda trasladá pa un husgado kustodiá pa un fuerte dispositivo di seguridat.

Mortonan i e outor di e atake
E presidente Iván Duque, ku a dekretá tres dia di luto nashonal, a indiká ku entre esnan ku a pèrdè nan bida tin personanan nashonalmente di Ecuador i Panama. Te ainda, nuebe di e 21 víktima mortalnan ya a logra keda identifiká, vários di esaki nan tabata deportistanan ku edatnan entre 20 i 25 aña.

Entre e personanan ku a pèrdè nan bida, tabatin tambe e supuesto outor di e atake, kende a keda identifiká komo José Aldemar Rojas.

Den oranan di djaweps mainta, un outo – bòm a eksplotá den e skol di polis i segun investigashonnan revelá pa fiskalnan den e kaso aki, e persona ku tabata manehá e vehíkulo aki tabata Rojas, kende ta mihó konosí komo ‘Mocho Kico’. Ta trata aki di un eksplosista di ehérsito di Liberashon nashonal.

Segun fiskalnan kolombiano, Rojas tabatin 17 aña na servisio di frenta Adonay Ardila Padilla, kende ta operá den Departamento di Arauda, Boyacá i Casanare.