Dos persona ta pèrdè nan bida durante evakuashon di sunami

54
E temblor tabatin un magnitut di 6.7 grado riba skala di richter.

SANTIAGO DE CHILE – Dos persona a pèrdè nan bida den oranan di djasabra último durante e proseso di evakuashon ku a keda realisá den sektornan na kosta di e region chileno di Coquimbo pa un menasa di sunami. Esaki despues ku e zona a sufri un temblor di magnitut 6.7 riba skala di richter.

E Ofisina Nashonal di Emergensia di Chile a indiká ku un di e personanan ku a pèrdè nan bida tabata komiendo den un restorant di e lokalidat di Penuelas i a sufri un paro kardiorespiratorio na momentu ku e evakuashon a inisiá.

E otro persona a pèrdè su bida tambe debí na un ataka, den e region di La Serena, sin ku outoridatnan a divulgá masha detaye di e kaso.

Dos minüt despues ku e temblor a keda registrá, kua a keda sintí na 22.32, komo promé medida Onemi a ordená evakuashon preventivo direkshon zonanan sigur na kosta di e region di Coquimbo debí na rísikonan di un sunami.

Algun minüt despues, e Servisio Hidrografiko i Oseanografiko di Armada, a establesé ku e karakterístikanan di e temblor no tabata reuní e kondishonnan nesesario pa generá un sunami na kostanan di Chile. Pe motibu aki a ordená pa anulá e òrdu di evakuashon.

E Sentro di Temblornan Nashonal di e Universidat di Chile, a detayá ku e episentro a keda lokalisá na 13 kilometer ost di e lokalidat di Tongou, na 430 kilometer nort di Santiago de Chile. Esaki ademas tabatin un episentro di 50.1 kilometer di profundidat.

E movementu aki a keda sintí tambe na e regionnan di Atacama, Region Metropolitano, Valparaíso i O’Huggings.