Chuchubiweg– Den aña 2018 ATSK a registrá un kantidat di 13.168 aksidente ku ta un bahada di 3% kompará ku aña 2017. Luna di desèmber ta keda e luna ku Forensys a bai duna mas asistensia na momento di aksidente. Den e luna aki a registrá un total di 1244 aksidente di tráfiko ku te ainda den historia ta e kantidat mas haltu registrá.

Febrüari a resultá e luna ku mas tiki aksidente registrá (979). Desèmber tabata e luna tambe ku a registrá mas víktima (5).  Nos tráfiko a eksihí 18 víktima. Di e kantidat aki 10 tabata shofùr, 3 pasahero, 3 peaton i 2 motosiklista. Un total di 13 hende hòmber i 5 hende muhé a pèrdè nan bida. Mayoria víktima tabata entre 20-29 aña di edat (5). Djadumingu ta e dia den siman ku pa añanan ta registrá mas víktima. Aña pasá e tabata 8.

Djadumingu mardugá tambe ta e orario kaminda nos tráfiko ta eksihí mas víktima. Aña pasá e tabata un kantidat di 5. Den e último 5 añanan aki,di e kantidat di 92 persona ku e pèrdè nan bida den tráfiko, 30 % ta riba djadumingu, sigui pa djabièrnè ku 16 %. Djarason ta e dia ku a registrá mas tiki (6 %).  E kaminda ku ta kondusí pa Westpunt ta keda e kaya ku ta eksihí mas víktima (3).  Pa loke ta trata sifra di e kantidat di heridonan ku a keda interná na Sehos i e kantidat di personanan ku a haña solamente tratamentu médiko na nos poliklínika, ATSK lo publiká esaki na un otro okashon. Aki ta sigui un bista di sifranan di tráfiko di e último 5 añanan:

 Aña                 Aksidente     Víktima          Herido

2014               12.318            19                    665

2015               11.602            20                   600

2016               13.496            18                    541

2017               13.550            17                    459

2018               13.168            18                    ???