Luwi Jano i Darwin Gregg ta sali pa Aruba pa ensayá ku Buleria

328
Djaluna 28 di febrüari nan dos ta sali pa Aruba, pa asina nan ensayá nan Tumba ku Buleria.

WILLEMSTAD,—-Di informashon ku a drenta na mesa di redakshon di ‘E Mulina’, ta bisa ku djaluna 28 di yanüari ta lanta vuelo pa Aruba Rei di Tumba 2018 i su kompositor, ta trata aki di Urvin “Luwi” Jano i Darwin Gregg.

T’asina ku nos tin informashon ku e dou ariba menshoná ta bai pa asina nan kuminsá ensayá ku agrupashon musikal Buleria ku ta e banda ku a kompaña Luwi Jano aña pasa den festival di Tumba. ‘E Mulina’, a drenta den kontakto ku Darwin Gregg i nos a bisé di e informashon ku nos ta disponé di dje, e kantante kompositor i areglista a konfirmá na nos ku en bèrdat djaluna 28 di febrüari  ámbos persona ta sali pa Aruba, pa asina nan pasa nan promé dia di ensayo.

Mas álue nos fuente a bisa nos ku Darwin Gregg un biaha mas tin un mònster di komposishon pa Luwi Jano, esaki ta nifiká ku e Rei di Tumba 2018 ta bai defendé su korona ku bista i mira pa bolbe ripití komo Rei di Tumba den 2019.

Mester bisa ku Buleria ta presentá djarason 6 di febrüari, paso e regla ta ku e banda ku e Rei di Tumba presentá kuné ta esun ku ta sera e di tres dia di festival di Tumba. No tin duda ku tur hende ta bai sinta na punta di nan stul pa mira e presentashon di Luwi Jano den e di 49 edishon di festival di Tumba.