Mas di 60 réplika registrá despues di temblor na Chile

48
Destroso ku a keda atras despues di e temblor.

SANTIAGO DE CHILE – Mas di 60 réplika a keda registrá den e último oranan na nort di Chile despues di e magnitut di 6.7 grado ku a keda registrá den oranan di djasabra i kua a laga saldo di dos morto atras.

E mayoria di e réplikanan, un di magnitut 4.7 grado, tabatin su orígen den serkania di e lokalidat di Andacollo.

Tambe na e siudat di La Serena, mas di 30 bibienda a resultá afektá i tambe algun edifisionan chikí. Esaki miéntras ku e katedral a keda ku destrosonan serio na su kurpa.

E alkalde Roberto Jacob a indiká ku e tèmpel, konsiderá un monumento históriko, ta a keda ku problemanan despues di e temblor registrá na aña 2015.

Na Coquimbo, masoménos nuebe mil persona ainda ta sin suministro eléktriko. Esaki segun loke a keda indiká pa e empresa ku ta proporshoná e suministro mes, kende ademas a detayá ku e zona ta kompletamente bou di trabou i komo prioridat pa restablesé konekshon.

Despues di e temblor di 6.7 grado riba skala di richter, kua a afektá sinku diferente region di e nashon, a informá di morto di dos persona.

Un muhé di 74 aña di edat, ku a pèrdè su bida di un paro kardiako, tabata huntu ku su yu muhé i un hòmber di 64 aña ku a sufri un atake miéntras e tabata aparentemente den un restorant.

Chile ta situá riba e asina yamá ‘Cinturon de Fuego del Pacifico’, i ta keda konsiderá komo un di e paisnan ku mas temblor ta registrá riba mundu despues di Hapon. Esaki ademas ta e di kuater den sufri mas katástrofe natural.

E temblor di Chillán di aña 1939 tabata esun mas serio den historia di Chile, ku un sifra ofisial di 5.648 morto.

Esun di Valdivia di aña 1960, tabata esun mas potente registrá den historia di humanidat, ku un magnitut di 9.5 riba skala di richter.