“Road Bang 2019” ta titulo di e Roadfire di agrupashon musikal DREAMS

187
Axel Pikero a manda su promé Bòm kaya.

WILLEMSTAD,—-Agrupashon musikal DREAMS a manda nan promé Bòm kaya, ta trata aki di un Roadfire ku sin duda ta bai bira un hit grandi den temporada di Karnaval. Dreams ta lansa su Road Bang 2019 speshalmente pa e temporada di karnaval. Atraves di añanan Dreams a demostrá di ta un di e agrupashon nan musikal mas dinámiko i inovativo den temporada di karnaval.

Tantu ku nan partisipashon nan eksitoso den festival di tumba i tambe e ambiente ku nan ta desplegá den kayanan di Otrobanda durante marchanan. Hitnan klásiko manera, Danza Coduro, Zeta lomba, Den mi asuntu i e RoadBang 2017 ku partisipashon di Lady Lava, ta zona ku bon frekuensha te ku dia di awe.

E aña aki no ta un eksepshon, Axel Pikero semper ta pèrkurá pa ta masha kreativo i buta artistanan riba un plano mas haltu den nan karera musikal manera a sosodé ku por ehèmpel Lady Lava. Despues di su kolaborashon ku Dreams, e ta gosa di un popularidat enorme den e genero di karnaval i bon ambiente.

Na e okashon aki, un biaha mas Axel ta perkurá pa traha ku karanan nobo o deskonosí pa ku karnaval. Ku lansamentu di e Road Bang 2019, Dreams ta introdusí Mc Oye, Gody, i Encho. Igmar Lareine tambe ta forma parti di e produkshon pero no ta un deskonosí.  For di awe e Road Bang 2019 ta zonando na tur radio emisora lokal i plataformanan di media sosial. Dreams lo kompaña e gruponan Estreno mas Pikete i Hats Off To Dreams den gran marcha.