Sontje Mercelina ta keda korona komo Rei di Tumba Hubenil 2019

298
Nos Rei di Tumba Hubenil 2019.

WILLEMSTAD,—-Djasabra tras di lomba riba “Kleine Werf” dilanti un públiko basta grandi a tuma lugá Festival di Tumba Hubenil, kaminda ku 15 hóben a partisipá. Mester bisa ku despues di hopi aña Kòrsou a haña un festival di Tumba riba un nivel hopi haltu.

T’asina ku alrededor di 10 or di anochi e resultado final a drenta, kaminda ku e Mc di e anochi Giovani Abath huntu ku tres otro Mc ku a hasi un tremendo trabou a anunsiá ku Charlson “Sontje” Mercelina komo nos Rei di Tumba Hubenil 2019.

Pa loke ta trata e resultado kompleto ta Quincy Gregorio di 3e finalista, Errol Cordero Reyes di 2e finalista, Zouk’aino Jacobs  pa 1e finalista i Charlson “Sontje” Mercelina a resultá e ganadó apsoluto.

Aparte di a bira nos Rei di Tumba 2019, Charlson (Sontje) Mercelina a bai tambe ku e premionan Mihó Bos i Mihó Aktuashon, miéntras su tumba “Sòldá di karnaval” a gana e premio Mihó Letra.

E kantante Zouk’aino su tumba titulá “Tumba ku tambú” a risibí premio 1e finalista Mihó Letra. Shentily Zimmerman a risibí e premio Partisipante Mas Popular, miéntras online tambe el a risibí mayor kantidat di voto. Premio Partisipante Dinámiko a bai pa Xiandrah Statia i Premio Estímulo a bai pa Darlisha Valks.