11 morto registrá den otro aksidente di tráfiko na Bolivia

59
Bùs ku a keda di bòltu despues di kai den bashí.

BOLIVIA – Un total di 11 persona a pèrdè nan bida i otro 25 mas a resultá heridá na momentu ku un bùs a kai for di un baranka na un karetera di e departamento di Tarija, na sùit di e pais.

E aksidente aki a keda registrá den oranan di ayera mainta na e lokalidat ariba menshoná, na Cieneguillas.

Segun un informe preliminar, tin un total di 25 persona heridá i 11 ku a pèrdè nan bida. Esnan heridá a keda trasladá pa un Hospital di San Juan de Dios, di e siudat di Tarija.

E vehíkulo ta pertenesé na e empresa di transporte 23 di marzo i tabata biaha for di Tarija direkshon e region bisiña di Chuquisaca.

E kousanan di e aksidente ainda ta keda investigá.

E insidente lamentabel aki a keda registrá despues di otro aksidente registrá djasabra último na e karetera entre e regionnan di Oruro i Potosí, lagando saldo di 22 morto i otro 37 persona heridá.