Promé Minister di Kòrsou i Promé Minister di Ulanda a firma un Kombenio di koperashon
Otrobanda — Djaluna último Promé Minister di Kòrsou Eugene Rhuggenaath i Promé Minister di Ulanda Mark Rutte a firma un Kombenio di koperashon, kual tin e e nòmber ‘Groeistrategie Curaçao’ (Strategia di Kresementu Kòrsou). E kombenio ta trata di modernisá e relashon di koperashon entre e dos paisnan. E ta un impulso nobo den e relashon entre e dos paisnan den Reino, pa un koperashon amplio, ku bista riba mehorashon nan duradero na Kòrsou.

Kòrsou a traha un plan koherente i integral, yamá ‘Groeistrategie Curaçao, integral i huntu’, pa mehorá kresementu ekonómiko, maneho finansiero i e organisashon gubernamental di Kòrsou. A pidi yudansa di Ulanda den implementashon di e plan.

Pa Kòrsou e firmamentu di e kombenio ta nifiká un impulso èkstra i sosten pa por bai pa e retonan kompliká i koherente ku gobièrnu ta haña su mes konfrontá kuné. E ta brinda mas oportunidat pa stimulá mehorashon nan ekonómiko, den maneho finansiero i den e aparato públiko, na lugá di djis wak e problemanan di presupuesto riba término kòrtiku, manera identifiká dor di entre otro College Financieel Toezicht (CFT).

Aunke Gobièrnu di Kòrsou por lo pronto ta sigui mira e retonan di presupuesto komo prioridat haltu, ta mira firmamentu di e kombenio, komo oportunidat grandi pa hasi un kambio struktural na e kousanan fundamental di e aspektonan presupuestal. Pa e motibu aki, Gobièrnu ta bai pa tur dos trayekto. Ulanda tin hopi apresio pa e Strategia di Kresementu i ta mira e importansia di e kolaborashon den implementashon di e plan. I esei a resultá den firmamentu di e kombenio dor di ámbos partido.