E skorpionnan ta sigui traha pa haña Levi Carolus

156
Willemstad,– Apesar ku dirigentenan di Wild Cats a bisa Vigilante ku nan no ta laga niun hungadó ku no ta liber bai, nos tin informashon ku ketu bai e ekipo di Royal Scorpions ta tras di Levi Carolus Jr.

Segun nos fuente t’asina ku Scorpions lo ta reuniendo ku Carolus i ku hasta nan lo mester a papia ku dirigentenan di Wild Cats kendenan a pidi pa warda otro siman pa wak ki desishon nan ta bai tuma.

Aparentemente tin un dil entre Wild Cats i Scorpions tokante trabou pa sierto peloteronan, pero di ámbos banda nan ta wantando duru ku e informashon aki i no kier slèk nada.

Di tur manera Wild Cats a bisa ku nan no ta laga niun hende bai, pero Scorpions ta insistí ku nan ta serka di keda kla ku Levi Carolus. Ban mira kon e kosnan lo desaroyá ora ku e hòmber grandi di Wild Cats yega Kòrsou otro siman.