Encho tambe ta hasi su debut den Tumba 49

246
E ta bai hasi su debut den Tumba 2019.

WILLEMSTAD,—-E aña aki Festival di Tumba ta bai konta ku algun artista ku ta bai hasi nan debut. Esaki sin duda ta bon, paso den nan forma nan tambe ta yuda krese festival di Tumba. Di informashon ku a drenta na mesa di redakshon di ‘E Mulina’, ta bisa ku e popular komediante Encho e aña aki ta bai partisipá den Festival di Tumba.

Nos tin informashon ku Encho ta bai partisipá ku un komposishon di Darwin Gregg. Mester bisa ku den pasado Darwin a yega di komponé diferente komposishon pa diferente personahe den nos komunidat ku ta super popular.

Pues e aña aki ta toka turno na Encho ku na e momentu nan aki tin e kaya di komedia den su gara. No ta un sekreto ku Encho a bira super popular ku figura nan manera Nito Polis i Uka. ‘E Mulina’, a drenta den kontakto ku Darwin Gregg ku ta e kompositor di Encho su Tumba, i nos a bisé di e informashon ku nos ta disponé di dje, den mes un rosea Darwin a bisa Encho su Tumba tambe ta fuerte i ku e no ta bin pa basilá.

Tambe nos a drenta den kontakto ku Encho, i manera ku e la kontesta su telefon, nos a atake ku e informashon ku nos tin rondó di su partisipá den Festival di Tumba di e aña aki, mester bisa ku sin pensa dos biaha Encho a bisa ‘E Mulina’, ku “Si mi ta den, anto mi ta bin hopi duru aden tambe, mi ta tuma mi partisipashon den festival di Tumba 100% na serio, pues wak mi djadumingu awor na momentu ku mi kana drenta den Curaçao Festival Center.