Gobièrnu di Maduro ta akusá Pence di ordená aktonan violento

85
Mike Pence, kende a indiká ku e ta ku e pueblo venezolano den nan lucha.

CARACAS – E minister di informashon di Venezuela, Jorge Rodrgiuez, a indiká den oranan di djamars último ku e visepresidente estadounidense, Mike Pence, a ordená aktonan violento na su pais i a sigurá ku e marcha di awe lo duna hopi di papia.

Segun Rodriguez a indiká, esnan ku ta sigui Pence no ta simplemente sigui un rekomendashon pero ku ta sigui un òrdu, pues Mike Pence ta duna nan òrdu di kima, òrdu di mata, òrdu di realisá aktonan di dispositivonan falsu.

E vise presidente merikano, Mike Pence, di su banda a publiká den oranan di djamars último den un video, ku e ta kalifiká e presidente venezolano, Nicolas Maduro, komo un diktador i nèt un dia promé ku marcha konvoká, ta indiká na e pueblo di Venezuela ku e ta tur tur ku nan.

Esaki a sigui indiká na e pueblo venezolano, ku ora ku nan ta bai alsa nan bos, nan mester laga esun di e pueblo estadounidense tambe keda skuchá. Esaki a indiká ku e ta ku e pueblo den e lucha i e ta apoyá i ku nan lo sigui ku esaki te na momentu ku demokrasia na Venezuela keda restourá.

E visepresidente ademas a indiká ku Asamblea Nashonal, kontrolá pa oposishon, ta e último rekurso di demokrasia na Venezuela i a indiká un biaha mas ku e ta duna nan su apoyo inkondishonal.

El a sigui indiká, ku nan ta respaldá e desishon balente di Guaidó, kende siman pasá a deklará su mes komo esun ku t reklamá poder di Asamblea.

For di dia ku Maduro a bolbe tuma kargo di poseshon di su kargo dia 10 di yanüari último, e gobièrnu estadounidense solamente a rekonosé legitimidat di Asamblea nashonal, kontrolá pa oposishon for di yanüari di aña 2016.

E Union Oropeo, e Grupo di Lima i Estádos Unídos a rechasá e tumamentu di poseshon di Maduro, ku ta na poder for di aña 2013 i a resultá reeligí pa un periodo di seis aña mas den un elekshon selebrá na luna di mei último.

Un dia despues ku Maduro a hura pa su kargo, Guaidó a pidi apoyo sivil, militar i ekstranhero pa asina asumí e gobièrnu di su pais.

Oposishon pa e mesun motibunan aki a konvoká un gran marcha den oranan di ayera, fecha ku ta konmemorá kaida di diktadura di Marcos Perez Jimenez, ku e ophetivo di rechasá e segundo mandato di Maduro.