Parlamentario di MFK Gilbert Doran: Fasilidat nan deportivo ta den estado deplorabel.

303
Señor Gilbert Doran, parlamentario pa partido MF ta bisa ku lástimamente e maneho deportivo na Kòrsou, no ta esun mas optimal.
Willemstad,– Segun parlamentario Gilbert Doran, apesar ku nos boka ta yen ku deporte ta importante pa funshonamentu di un kurpa i mente sano, tòg nos por nota ku ta un negligensia total tin pa fasilidat nan deportivo aki na Kòrsou.
E parlamentario a splika Vigilante ku nos ke pa hóben nan ta positivamente aktivo, pero di otro banda no ta manteniendo fasilidat nan deportivo di moda ku hóben nan por rekreá i desaroyá nan talento deportivo.

Señor Doran ta bisa ku lástimamente e maneho deportivo no ta esun mas optimal.
“Nos a hasi un rekorido na diferente kancha i vèlt nan ku a lansa nan gritu pa yudansa na vários okashon sin haña oido, nos sa ke situashon finansiero di pais ta den un situashon preokupante, pero si nos por paga ‘consultent’ nan míles i asta miónes nan salario, dikon no por destiná algu dje kantidat enorme ku ta paga nan ei pa fondo di deporte entre otro?”, asina Doran ta puntra.
E ta bisa ku si bai riba e kantidat di fasilidat nan ku ta grita pa yudansa nos a yega na un total di 39 fasilidat nan deportivo ku ta den estado deplorabel.
Nos minister enkargá ku deporte a informá den reunion públiko e siman aki, ku el a manda un karta na minister di finansa señor Kenneth Gijsbertha for di 30 di aprel 2018 pidiendo e pa un asina yamá fondo pa deporte den forma di entre otro lotto òf kualke otro sistema, i e ta wardando pa e kontesta.
“Nos ta spera ku señor Kenneth Gijsbertha ku nos sa ku tambe ta hòmber di deporte, lo hasi esfuerso pa mas pronto ku ta posibel nos lo por yega na un fondo pa akapará entrada pa por hèndel ku fasilidat nan deportivo mas pronto ku ta posibel ku ta na bienestar di desaroyo di nos komunidat en general i hubentut en partikular. “39 fasilidat deportivo den mal estado, ta hopi. Mi ta spera ku pronto nos lo por tende un notisia positivo riba nos prekupashon”, asina Gilbert Doran parlamentario pa MFK a splika Vigilante ayera.