Quincy Martina ta bira mènedjer nobo pa Santa Rosa Indians

152
Quincy Martina, yu di kompader Martina a tuma un reto pisa pa 2019 kaminda e lo manehá e ekipo di Santa Rosa den “AA”
Willemstad,– Vigilante tin e informashon aki ta kana kuné basta dia, pero riba petishon di nos fuente, nos a wanta un ratu ku esaki dunando oportunidat na Santa Rosa pa atendé e asuntu di forma formal.

T’asina ku for di aña pasa Vigilante a skibi ku lo tin por lo ménos 4 ekipo ku lo bai tin mènedjer nobo pa temporada 2019. E dia ei Vigilante a anunsiá ku Wild Cats, Marchena i Kwartier lo tin un mènedjer i ku tin un ekipo mas di kual nos no menshoná e nòmber, mirando ku ketu bai Sendley Reina tabata mènedjer di e ekipo.

Entretantu ya direktiva di e  ekipo a pone señor Reina na altura i kende porsierto a bisa ku e no tin problema i lo keda yuda e ekipo ku e mesun animo. Pues e úniko ekiponan ku lo tin mesun mènedjer den 2019, lo ta Raymond van Gurp ku Scorpions, Ramiro Balentina ku Santa Maria i Hensley Josephina ku Firebirds. Porsierto Josephina tambe kasi kasi a bandoná e ekipo, pero kosnan a keda regla di manera nèchi.

Santa Rosa Indians den 2019 lo ser manehá pa e hóben Quincy Martina, yu di e legendario picher Rignald ‘Kompader’ Martina eks picher di Scorpions i Wild Cats den su bon tempu.

Quincy ta un hóben ku tabata firma komo profeshonal i kende tin algu aña kaba ku e ekipo di Santa Ros ai último añanan el a yuda tambe den e parti tékniko di e ekipo.

Pues e kuerpo tékniko di e Indjannan ta keda práktikamente mesun kos i solamente Quincy ta bira mènedjer i Sendley Reina ta bira koach sin niun problema.