Sospechoso (23) tiroteo Helmond den libertat

49
víktima (2) ainda den hospital
HELMOND—Polis mester a laga e sospechoso di 23 aña liber ku a keda detené ayera relashoná ku e tiroteo kaminda dos hende a keda heridá.

E hòmber no ta sospechoso mas segun polis. Investigashon ta indiká ku e no ta envolví den e insidente. Den e tiroteo dos persona inosente a keda alkansá ora a lòs tirunan riba un outo. Ta trata di un kriatura di 2 aña i un hobensita di 15. E kriatura tabata riba baiskel ku su mama i a keda alkansá na su pia, ainda e ta den hospital. E hóben tabata kana banda di e outo ora a lòs e tirunan. El a keda alkansá na su brasa i tambe a keda transport pa hospital pero entretantu e por a bai kas. E insidente a tuma lugá alrededor di 15:30 den area komersial. Djis despues di e tiroteo un outo a kore bai riba velosidat haltu. Despues a haña e vehíkulo bashí. E tirunan a alkansá parti patras di e outo. E okupantenan a hui lagando e outo atras. Polis ta buskando tur. No tin informashon di e kousa dje insidente. Burgemeester Elly Blanksma di helmond ta den shòk. El a bishita e víktimanan. E ta haña totalmente inaseptabel ku muchanan ta bira víktima di tiroteo di dia kla den sentro komersial. Entretantu a bira konosí ku a detené un otro sospechoso di 21 aña relashoná ku e kaso.