Ta kita nashonalidat di rapper Marouane B

126
rapper yihadista ta pèrdè nashonalidat hulandes
DEN HAAG—Sekretario di estado Mark Harbers (Migrashon) a kita nashonalidat hulandes for di kantante rapper yihadista Marouane B.

Ainda e tin su nashonalidat marokano. B di 23 aña a afiliá den 2013 na teroristanan di IS i a keda kondená aña pasa na 6 aña di kastigu pa partisipashon na un organisashon terorista. E tabata notisia aña pasa pasobra el a manda un kantika rap pa Crimesite ku e titulo “Mi ta bin bèk”. For di 2017 a kita nashonalidat hulandes for di 12 yihadista. Esaki por solamente si un hende tin dòbel nashonalidat. B ku a bishita Siria a gradisí pa su kastigu di 6 aña pa su delitonan. Si nan detené mi, mi ta sinta kastigu kontentu, el a deklará. Segun lei penal hulandes mi por haña kastigu bida largu pa e kosnan ku mi a hasi ku e enemigunan di Allah, el a skirbi. E no a bisa kiko el a hasi. El a bisa den su deklarashonnan ku el ta sostené yihad den Benelux. Esaki dor di komete atrakonan ku intenshon pa manda e plaka pa estado islamiko. Hasi uso di demokrasia den paisnan Benelux, e no ta e meta sino e medio pa lanta un provinsia nobo di estado islamiko. El a bai Siria ku kantante Robbin van D. ora e último aki a bolbe Hulanda, B a keda. E kier a yuda e pueblo siro, pero enbes a partisipá den aktonan terorista di IS.