Lider di Parlamento ta outoproklamá su mes komo presidente di Venezuela

124
Grupo di personanan ku a subi kaya den oranan di ayera.
CARACAS – E presidente di Parlamento venezolano, Juan Guaidó, a anunsiá den oranan di ayera ku el a outo proklamá su mes komo presidente den e lucha kontra Nicolas Maduro, kende e ta konsiderá ilegal.

Segun Guaidó su palabranan, den kondishon di presidente di Asamblea Nashonal, invokando artíkulonan di konstitushon, dilanti Dios Todopoderoso i Venezuela, el a hura di asumí formalmente e kompetensianan di ehekutivo nashonal komo presidente enkargá ku Venezuela.Entre gritunan di hubilo, Guaidó a indiká ku e paso aki ta pa asina logra pone un fin na loke ta sosodé na e pais i instalá di e forma aki un gobièrnu di transishon i tin elekshonnan liber.

Apoyá pa Donald Trump
Algun momentu despues, e mandatario di Estádos Unídos, Donald Trump a anunsiá ku e ta rekonosé e presidente di Asamblea nashonal de Venezuela, Juan Guaidó, komo e presidente interino di Venezuela.

Trump den mesun rosea a alertá ku lo e sigui baha peso di su poder ekonómiko i diplomátiko pa asina preshoná pa asina logra restourashon di demokrasia na Venezuela.Sekretario di Estado di Estádos Unídos
E Sekretario di Estado di Estádos Unídos, Mike Pompeo, tambe a pidi Maduro den oranan di ayera pa e renunsiá. Esaki debí na e eksistensia di un lider nobo legítimo ku ta reflehá boluntat di e pueblo venezolano. Esaki refiriendo naturalmente na Juan Guaidó.Esaki ademas a indiká ku esaki ta reflehá e boluntat di e pueblo venezolano mes. Den e mesun nota aki, a ripití e petishon na militarnan venezolano, i esnan di forsa di seguridat pa asina nan respaldá e demokrasia i protehá e siudadanonan venezolano.

Den mesun rosea a indiká ademas ku nan gobièrnu ta dispuesto na brinda asistensia humanitario na e pueblo di Venezuela, segun e kondishonnan ta permití.Maduro a duna diplomátikonan 72 ora pa sali for di su pais
Den mesun rosea e aktual presidente di Venezuela, Nicolas Maduro, a anunsiá despues su desishon di kibra tur relashon diplomátiko i polítiko ku e gobièrnu di Estádos Unídos. Esaki despues ku el a akusá nan di intervení den e pais i a duna esaki nan 72 ora pa bandoná embahada.

Dilanti na e hubilo di vários 100 simpatisante ku a marcha den oranan di ayera na Caracas pa asina respaldá su legitimidat, Maduro a sigurá ku e ta tuma e desishon aki komo e presidente di konstitushon, kabesante di estado, kabesante di gobièrnu i den kumplimentu di su funshonnan ku el a hura dilanti pueblo di respetá.Den e mesun rosea esaki a indiká ku hustisia tin di ‘aktua’ despues di outoproklamashon di Guaidó. Esaki a indiká ku esaki siguiendo e lei i e kódigonan di Venezuela.

Komunikado pa Embahadanan na Venezuela
Den oranan di mas atardi, a sali un komunikado dirigí na tur embahada na Venezuela. Den esaki a komuniká na tur kabesante di mishonnan diplomátiko i nan personal na Venezuela, ku e pais ta deseá firmemente pa nan mantené nan presensia diplomátiko.

Den mesun rosea a insta pa deskonosé kualke òrdu òf disposishon relashoná ku esaki ku ta kontradesí e propósito firme di e poder legítimo di Venezuela.Loke mas a hala atenshon, ta ku e komunikado aki a keda firmá pa Juan Guaidó, komo e presidente. Esaki sigur hasiendo referensia na deklarashonnan di Maduro.Opositor kubano ta apoyá protestanan venezolano
E Asamblea di Resistensia Kubano a ekspresá na Miami, tokante di su apoyo pa e protestanan ku ta desaroyando na Venezuela, ku e propósito di ‘desalohá e diktador’ Nicolas Maduro.

Orlando Gutierrez, sekretario general di Direktorio Demokrátiko Kubano, a mustra di su banda, su solidaridat ku e pueblo venezolano den nan derechi di sali riba kayanan pa protestá kontra diktadura di Maduro.

Segun Gutierrez a sigui indiká, ‘diktadura asesino’.

Ocho morto registrá kaba den protestanan
E ola di violensia i konfrontashonnan durante e protestanan realisá na Venezuela, a laga saldo di ocho persona morto. Esaki segun loke a keda revelá pa fuentenan di Ministerio Públiko di Venezuela,

Segun tur kos ta indiká, kuater di e víktimanan aki a fayesé na e estado di Bolívar, durante manifestashonnan ofisialista i opositor di ayera. Esaki despues ku nan a sufri heridanan di bala.Gobièrnunan ku ta sostené Guaidó
Despues ku Juan Guaidó a hasi su anunsio i outoproklamá su mes presidente interino di su pais i a keda apoyá pa Donald Trump, presidente di Estádos Unídos, a surgi algun otro reakshonnan.

Iván Duque, presidente di Colombia, a ekspresá tambe ku ta rekonosé Guaidó komo presidente di Venezuela. Gobièrnu di Brasil tambe a emití un nota rekonosiendo Guaidó i anunsiá ku lo apoyá polítika i ekonómikamente, e proseso pa demokrasia i pas na Venezuela.

Di otro banda tambe tin e gobièrnu di Perú, ku a suma su mes na respaldo i rekonosementu di Guaidó esaki ademas huntu ku e presidente di Chile, Sebastián Pinera, presidente di Paraguay, Mario Abdo, presidente di Argentina, Mauricio Macri, di Guatemala i tambe di Ecuador.