Benta di UTS ta garantisá ku nan por sigui

234
Desishon: Gobièrnu su tarea ta tuma desishon di maneho basa riba bienestar di Kòrsou.
Saliña– Parlamento den un moshon di 10 di desèmber 2018 a urgí gobièrnu pa presentá un proposishon pa ku benta di akshon di UTS. Minister Jesus Leito  den reunion públiko di Parlamento último  a duna un splikashon amplio di e proseso den kual e benta di e kompania ta.

Minister Jesus Leito a mustra riba e echo ku ta for di e momento ku a liberalisá e merkado di telekomunikashon na aña 1998 esaki a afektá e posishon komersial i finansiero di e kompania UTS. Esaki Sra. Pauletta den su disertashon a reforsá. Sra. Pauletta ta indiká ku a krea un kompetensia inhustu pa e kompania di UTS, sin ku a duna e UTS un forma pa sigui funshoná di forma optimal. Den e mundu di telekomunikashon ta importante pa un kompania keda invertí den teknologia i infrastruktura pa por keda kompetitivo. Di esaki Parlamento di Kòrsou tabata konsiente di dje for di aña 2014, lokual a resultá den e moshon di aña 2014. UTS aktualmente no ta disponé di e kapital nesesario pa por hasi e invershonnan aki, segun e último sifranan.

Segun sra. Pauletta, gobièrnu su tarea ta tuma desishon di maneho basa riba bienestar di Kòrsou. I e proseso di UTS aki ta kanando demasiado tempu sin ku a tuma un desishon, lokual dia pa dia ta perhudiká e kompania UTS. Den e kaso aki Gabinete Rhuggenaath, a base di un moshon di aña 2014 i unu di aña 2018 di Parlamento di Kòrsou, ta tuma un desishon pa e kompania, trahadónan i na finalmente Kòrsou.

Lokual sra. Pauletta ta indiká si ta, ku tin ku informá e trahadó di UTS di kada  paso ku ta tuma. Naturalmente kambio ta trese inseguridat i p’esei mester keda duna informashon i trese e seguridat aki. Petishon di sra. Pauletta durante e reunion públiko ta pa sigui informá e trahadó i si tin mas nesesidat pa informashon subi e frekuensia den kual ta kompartí informashonnan aki.