Djasabra atardi 4’or den Sabana Klèsh entre inviktonan den Liga Pariba Little League

82
Stanley ‘Ino’ Simmons ta un di e koachnan ku for di chikí a tren e tim ku awe ta invikto den Little Liga Pariba. Ino ta stima su muchanan i por mira kon e ta hisa Zhaydire na laira pa selebrá.
Willemstad,– Un biaha mas Liga Pariba a programa e wega entre e dos inviktonan den kampionato den divishon Little kual ta e ekipo di Tra’i Seru i e ekipo di Montagne Ariba.

E dos ekiponan aki a hunga un wega kontra otro, pero e partido a keda empatá despues ku a bira skur, miéntras ku e di dos biaha ku a programa e wega entre nan dos, tabata riba un djabièrnè ku awa seru a kai i obligá liga pa posponé e partido.

Finalmente djasabra awor pa 4’or di atardi si kos sigui asina dne nòmber di señor, e wega entre e dos inviktonan lo tuma lugá den Sabana Ballpark.

Den e torneo di FABB ku a kaba wikènt pasa ku Trai Seru titulando kampion, e ekipo di Trai Seru a derotá e ekipo di Montagne Ariba.

Pero fanatikonan di Montagne Ariba a laga sa ku Torneo Fabb no ta Liga i ku den Liga si ta otro gai lo kanta, miéntras ku di Trai Seru nan a laga sa ku semper ta Gai Kòra ta kanta, pues pa Trai Seru tur kos ta meskos i ta djis un wega mas i un viktoria mas.

Montagne Ariba ta konta ku nan mènedjer señor Kleinmoedig, miéntras ku Trai Seru tin komo mènedjer Joubert. Pues djasabra atardi 4’or den Sabana Ballpark kos lo ta hopi serio, mirando ku tur naturalmente lo kier mantené nan invikto.

Di parti di Tra’i Seru nan lo por opta pa bini ku Nathaniel Cijntje, miéntras ku Montagne Ariba lo por bini ku Rubiorne Manuel.