Duanero korupto Gerrit V mes a ofresé su servisionan

74
12 aña kastigu pa duanero ku kier a bin biba manera sheik na Kòrsou
ROTTERDAM—Ministerio Publiko a pidi 12 aña di kastigu kontra duanero Gerrit V ku tabata laga konteinernan ku droga pasa liber.

Ta tuma e duanero na malu ku el a tacha e konfiansa ku siudadania tabatin den gobièrnu. Gerrit V mes a tuma inisiativa pa yuda kriminalnan ku trafikashon di droga via haf di Rotterdam. E mes a tuma kontakto i informa baho mundu ku e por soru ku sierto konteinernan no pasa den kontrol. E por a yuda e kriminalnan pasobra e tabata traha den departamento pre-arrival, kaminda ta disidí kua konteinernan ta pasa scan. Esaki tabata ideal pa e kriminalnan. Nan tabata rekompensá Gerrit V ku sumanan kuantioso. Den entrada hudisial na su kas FIOD i reshèrshi a haña 670.000 euro na su kas. Tabata e intenshon di V pa gana basta plaka asina e por disfrutá na Kòrsou. Pero kosnan a kana diferente, asina fiskal a informa. Unabes bo drenta sirkulo kriminal nan no ta laga bo bai. V i su famia tabata keda menasá. Un bisiña a keda menasa tambe. Si FIOD i reshershi no a intervení, no ta sigur ku kriminalnan lo a laga V stòp segun OM. E demanda di kastigu ta enserá tantu importashon di droga komo korupshon i kriminalidat.