Kampionato beisbòl “AA” lo ranka sali den aprel

101
Direktiva di Febeko ta moviendo pa tur kos ta na lugá pa asina por kuminsá ku e kampionato di ”AA” den luna di aprel.
Willemstad,– Kampionato lokal di beisbòl “AA”, ta programa pa ranka sali dia 20 di aprel kaminda lo hunga seis buèlta i e sistema di klasifikashon lo ta meskos ku 2018, pues 6 ekipo lo sigui den lugá, kaminda e number seis ta hunga un wega kontra di e number sinku i e ganadó ta sigui i lo hunga kontra di e number kuater i e ganadó di e partido ei ta keda komo number kuater, pa despues kuminsá kue playoff di 1 kontra 4 i 2 kontra tres den serinan mihó di sinku.

E dos ganadónan lo hunga  seri final mihó di shete pa saka e kampion di 2019. Te ainda e weganan ta programá pa tuma lugá den e mesun tres parkenan, esta Stadion Johnny Vrutal, Stadion Tio Daou i Parke Heintje Kool.

E kampionato 2019 ta pinta di bira interesante mirando tur e moveshonnan ku a tuma lugá i tur esnan ku ainda falta pa tuma lugá. Un punto importante tambe ta e echo ku den 2019, tur ekipo lo por trese un picher estranhero komo refuerso i tur kos ta indiká ku tur e 7 ekiponan di “AA” lo hasi esaki, pero un mas promé ku otro.

Ekiponan ku ya tin un bon staf di picher, lo por opta pa hasi esaki mas lat den temporada spa e picher en kuestion por partisipá den e kantidat di weganan nesesario, miéntras ku esnan ku ta poko debil na picheo, lo mester bini ku e refuerso for di trempan opa trata di yega den e promé seis nan i despues e promé kuater nan.