Tin parlamentario ta sali kas bai trabou tur dia kue un A4 skibi loke minister bisa nan

Elvin Gerard:

552
Willemstad,– Señor Elvin Gerrad ta bisa ku e ta lamentá ku tin parlamentario ta sali nan kas bai trabou tur dia, kue un A4 skibi loke minister ta bisa nan sin buska informashon korekto i ta bin gaña pueblo i manipulá pueblo.

Señor Gerard ta splika ku esaki ta loke ku el a konstatá skuchando reunion públiko na momentu ku Parlamentario señora Mc William tabata papiando tokante di patrimonio nashonal ku for di aña 1990 te ku awor aki no a paga nada na dividendo na gobièrnu, “nan a paga NUL”.

Señor Gerard ta bisa ku ta bèrdat e tempu ei sindikato a wòrdu mal informá dor di defuntu Angel Kook, defuntu Julio Constancia i Señor Paulr De Geus.

Elvin Gerard ta bisa segun su persona for di 1990 ku señora Zita Jesus-Leito tabata direktor finansiero di UTS, KPMG tabata ouditá sifranan di UTS i tabata duna resultado final i semper a presentá ku a hiba pèrdida òf ganashi.

Gerard ta bisa ku ora tin pèrdida trahadónan no ta haña nada di ‘winstdeling’ ni gobièrnu no ta haña dividendo.

Mirando resultado di for 1990 te ku awor aki kaminda KPMG a oudita ku a hasi ganashi, gerensia ta partisipá e sifranan na trahadónan i sindikato, kuantu ta bai na tur e belasting nan ku tin ku kumpli kuné komo kompania i tambe e parti di dividendo ta wòrdu presentá i kuantu mester bai pa gobièrnu. E ta sigui splika ku a base di e restant ku sobra trahadónan tabata haña 5% di loke ku resta di winstdeling ku ta wòrdu parti den UTS, Telecuracao i TDS. Promé ku esei Setel so tabata hañ’é.

Señor Gerard ta splika ku nan a negoshá komo sindikato huntu ku ABVO dia gobièrnu mester a subi tur salario di trahadónan di gobièrnu ku 16.5% i SETEL/UTS no por a kubri esaki, nan a basha awa den biña e temporada ei pa tuma 9% di salario, anto sobra a bai na kosnan sosial, pa evitá ku ta subi gastu di kompania.

“Tambe dos biaha nos a entregá den e negoshashon di CAO 10 mion pa evitá ku gastunan personal ta subi, mi ta haña ta yamer ku Parlamentario Mc William no a hasi su ‘hùiswèrk’, paso Minister Kenneth Gijsbertha tabata President Commisaris di UTS”, asina Elvin gerard ta bisa.  Gerard ta sigui bisa ku pueblo di Kòrsou i trahadónan ke sa unda tur e sèn ku a bai pa dividendo di 1990 bin ariba ta, e ta puntra den saku di ken e sènnan a bai anto.

“Ken ta gañando pueblo: Direktor nan, Parlamentario señora MC William, KPMG (ku a ouditá e sifranan di tur aña), Minister Zita Jesus-Leito of Minister Kenneth Gijsbertha?”, asina señor Gerard a terminá su karta.