Insiguridat: na Banko Sentral rumornan di mal komunikashon entre direktornan nobo a trese mas insiguridat interno na e banko.
Skalo—Banko Sentral ta sigui den problema. Despues ku Tromp a sali for di e instituto, e organisashon a konfrontá hopi problema interno. Aktualmente, bou di personal di e banko tin hopi insiguridat, miéntras tin duda grandi si aktual maneho di e banko tin e kapasidat. Ademas, presensha di Etienne Ys, bastante regular den e banko ta tipifiká presensha polítiko na Skalo miéntras su posishon den Hunta di Supervishon ta wòrdu kuestioná seriamente den sirkulo bankario di Kòrsou.

E siman ami, rumornan insistente ta sirkulando di un posibilidat di Ulanda imponé un presidente direktor pa CBCS. Vespertino Nobo, wikènt último a lansa un notisia unda nan a señalá hasta inisial di e posibel presidente komisario nobo. Pero riba esaki no tin niun konfirmashon, ni tampoko fo’i Ulanda. E relashon entre e dos direktornan, Lelia Matroos Lasten i Jose Jardim, no ta kanando den bon miéntras ta kuestionando ámbos su kapasidat den téknika i aplikashon di supervishon. Den pasado ya kaba e banko a hañ’é konfrontá ku konflikto na nivel di maneho, despues ku Tico Chos Romero i Emsley Tromp no tabata komuniká mas. Pero aló ménos tabata trata di dos profeshonal ku hopi konosementu riba maneho di Banko Sentral i Supervishon. Vigilante a puntra Eugene Rhuggenaath si ta bèrdat tin un presidente direktor di Ulanda na kaminda, e la kontesta ku “di esei si mi no sa”. Fuentenan interno di e banko tambe a desmentí kategorikamente di un presidente nobo na kaminda.  Lokual tin hopi empleado prekupá ta e hecho ta tratando na invertí mas kapasidat den e departamento di relashonnan públiko en bes di konsentrá riba supervishon.