Emergensia na Brasil debí na kiebro di dam

35
Situashon ku a keda atras despues di e insidente.

RIO DE JANEIRO – Masoménos 200 persona lo por ta reportá komo pèrdí despues ku den oranan di ayera, djabièrnè, un dam ku tabata kontené residuo mineral di e kompania Vale, e produktor mundial mas grandi.

Un di e damnan di Vale situá den Bramadinho, munisipio di Minas Gerais, a kibra den oranan di ayera i un riu di lodo a destruí algun bibienda den serkania na e pueblo bisiña. Pero te ainda outoridatnan no a konfirmá si esaki a kousa víktimanan mortal.

Segun e kuerpo di bombero, kuater persona a keda atendé te ainda na sentro médikonan públiko, pa heridanan kousá pa e situashon aki. Tur esaki nan aparentemente ta den un situashon stabil.

E presidente di Brasil, Jair Bolsonaro, kende tin planiá di bishitá lugá di e tragedia den oranan di awe, a afirmá ku e mayor preokupashon di e gobièrnu na e momentu nan aki ta pa atendé posibel víktimanan di e tragedia grave aki.

E ehekutivo a krea ademas un gabinete di krísis pa asina kompañá e situashon i a afirmá ku tur e medidanan posibel ta wòrdu tumá. Esaki tumando na kuenta e gravedat di e echonan.
Segun a keda mustrá pa imágennan di televishon, e riu di lodo despues di ruptura di e dam, a arasá ku diferente bibienda, vehíkulo i ophetonan ku el a haña den su paso.

E empresa minero Vale, e mayor eksportadó di mundu, a atmití ku e aksidente aki kisas lo a laga víktimanan. Esaki nan a indiká ku tabatin trahadónan den e área atministrativo, kua a keda afektá pa e situashon. Ademas a indiká ku pa e motibu aki tin e posibilidat, kua no a keda konfirmá, ku por tin víktimanan.

E insidente aki a keda produsí tres aña despues di e ruptura di damnan minero Samarco, kontrolá tambe pa Vale i BHP Billiton. Esaki a provoká e mayor katástrofe ambiental di Brasil, kua a kousa 19 morto.

E tragedia di e momentu ei, a generá un ola di shete mion di meter kúbiko di residuo mineral, mesklá ku otro 55 mion di meter kúbiko di awa.