Rekompensa pa informashon tokante kaso di asesinato aña nobo 2018

Tin 5 mil florin pa yudansa

307
Ta sospecha ku ta na e aria aki nèt enfrente di hotèl Veneto e asesinato a tuma lugá.
Willemstad—— Polis a saka un komunikado unda ta pidi pueblo pa yuda pa asina por resolvé e kaso di asesinato ku a tuma lugá aña pasa riba e promé dia di aña.

Djaluna  1 yanüari  2018, alrededor di  00.40 or sentral di polis a haña notifikashon ku un tiramentu a tuma lugá riba un lugá di parker di un hotèl ku ta situá na Pater Eeuwensweg  I ku tin un persona gravemente heridá.

Na yegada di e promé patruya polisial nan a bin topa un SUV pará riba un lugá di parker outo i tabatin un hòmber drumí banda e SUV ku no tabata duna señal di bida. Te kaminda esaki tabata posibel i bou di e sirkunstansianan presente, por a mira un herida di bala na e parti ariba di e víktima su kurpa. Tambe tabatin tres(3) hòmber i un dama presente.    Mas aleu por a nota ku na e vehíkulo tabatin perforashon di bala.  For di un investigashon preliminar ku polis a realisá na e sitio a resultá ku e personanan aki tabata den e SUV i e víktima tabata stür. Dado momento nan a para na e hotèl pa hasi algu i na e momento ei un hòmber lo a presentá i los tiru(nan) dirigí riba e víktima. E víktima Tayler Zuhayr de LIMA nase na Kòrsou 1 yanüari 1998 a sigui kore bai pero a bin para e outo riba e lugá di parker ku ta keda un tiki mas leu i a bin fayesé na e sitio ei mes. Alrededor di 01.50 or dòkter di polis a konstatá morto di T. De Lima. En konekshon ku e kaso di asesinato aki, polis a pidi yudansa di komunidat pa kualke persona ku por a tuma nota di loke ku a sosodé den e mardugá ei, pa tuma kontakto ku polis pa asina por solushoná e kaso. Te na e momentunan aki e investigashon ta ketu bai tumando lugá i den e afan pa yega na un solushon di e kaso, Ministerio Públiko a pone sinku mil florin antiano di rekompensa, pa esun ku por duna e tep ku por hiba na klaridat i solushon di e kaso di asesinato aki. Pa duna tep riba e kaso aki, por yama e number anónimo di polis 108. Kuerpo Polisial i Ministerio Públiko ta konta riba yudansa di komunidat pa por solushoná e kaso aki tambe.