15 morto i 29 herido despues ku muraya ta kai durante kasamentu

66
Bùs ku a aksidentá i bai kai den bashí.

LIMA – Un total di 15 persona a pèrdè nan bida i otro 29 mas a resultá heridá den oranan di ayera despues di kaida di un muraya i un dak di un sala di hotèl, unda tabata selebrá un kasamentu na e siudat di Abancay.

Segun a keda indiká, e áwaseru intenso ku ta kai na Abancay ta loke ku a okashoná ku durante oranan di ayera, e muraya i dak di e Hotèl Alhambra a kolapsá miéntras tabata selebrá un matrimonio.

Ademas a indiká ku bombero nan boluntario i outoridatnan polisial ta kontinuá ku trabounan di búskeda di personanan i ku a e situashon ta keda supervisá pa e Sentro di Operashonnan di Emergensia Nashonal.

Den mesun rosea a indiká ku e kasamentu aki tabata konta ku asistensia di masoménos 100 persona, mitar di kua tabata serka di e muraya na momentu di e insidente.

Esnan heridá a keda trasladá pa e Hospital Regional di Abancay, i 15 di esaki nan ya por a bai kas despues di a kontrolá i solamente tabatin un leshon menor. Esaki miéntras ku sobrá ta permanesé interná ku pronóstikonan reservá.

Aksidente tambe ku 15 morto
Di otro banda tabatin un aksidente tambe ku a keda registrá entre un bùs i un trùk i ku a laga saldo di otro 15 morto atras. Ademas di e 15 personanan ku a pèrdè nan bida, otro 29 mas a resultá heridá despues ku un bùs i e trùk a kai for di baranka despues di aksidentá na e karetera di Arequipa, na sùit di e pais.

E aksidente aki a keda produsí den oranan lat di mardugá. Esaki na momentu ku e bùs tabata biaha di Arequipa direkshon e lokalidat di Chalhuahuacho, na momentu ku el a aksidentá ku un trùk, ku tabata bini riba man kontrali.

Pa motibu di e impakto entre ámbos vehíkulonan, tur dos a bai kai den abismo na un altura di masoménos 50 meter di profundidat.

Temblor tambe a laga saldo di seis herido
Ademas di ámbos aksidentenan ariba menshoná, otro seis persona mas a resultá heridá pero nada di gravedat. Esaki den un temblor di 6 grado di magnitut ku a sakudí e kosta sentral di e teritorio peruano.

E mayoria di e heridonan tabata presentá diferente sla i a sufri heridanan na momentu ku nan a kai den pániko i tabata intentá di sali for di nan bibienda i edifisionan di un forma abrupto durante di e temblor.

Entre esnan leshoná tin sinku muhé i un hòmber, kendenan a keda atendé na un sentro médiko, pero niun di gravedat.

E temblor aki a keda registrá na 15 minüt promé ku 12or i su episentro a keda lokalisá den laman, na 68 kilometer sùitost di e munisipio di Palpa, na e region di Ica.