Democraat Era Nobo ta preokupá pa situashon ekonómiko di Kòrsou

102
Jan Noorduynweg–  Democraat Era Nobo ta kontentu ku un delegashon di empresario Hulandes a bin aki huntu ku Promé Minister Rutte i Minister Knops, i a tuma nota di e akuerdo ku a ser firma pa koperashon. Democraat ta na fabor pa atraé invershonistanan for di Hulanda i for di otro paisnan, pero miéntras ku no kambia e maneho lokal, i no kambia red tape pa red carpet, nada lo kambia.

Democraat ta preokupá paso nos ta wak e realidat aktual i futuro di pais, kaminda dia pa dia, mas hende ta pèrdiendo trabou i mas empresario ta man na kabes pa motibu di situashon ekonómiko malu. Banda di esaki, hopi hende ta bandonando Kòrsou rumbo pa Hulanda. Kada proyekto i invershon lokal òf internashonal ta di aploudí, p.e. esun di mil baka ku a firma un MoU for di yanüari 2018, pero awe nos ta na yanüari 2019, pues 1 aña despues, i ainda no tin ni un baka. Democraat a komprondé ku a pasa un LANDSBESLUIT na final di novèmber ku lo lanta un werkgroep konsistiendo di personanan di 5 diferente ministerio, pero no a duna kontenido ainda na esaki, anto konosiendo e sistema, nos tin miedu ku e mil baka nan ta bai hoga na pos.

Minister di Ekonomia a papia di ku lo kita red tape i burokrasia, pero nos no ta mirando nada di red carpet pa e proyekto aki, kua aparte di lo krea 400 kupo di trabou lo tin un spin off grandi. Ainda mas importante ta e kantidat di karni fresku ku nos pueblo lo benefisiá di dje, mirando ku siman pasa a deskubrí ku e karni den diferente supermerkado tabata tin grado haltu di kontaminashon di bakteria. Nos di Democraat Era Nobo ta kere den Krio di Bestia, Peska i Agrikultura, i sigur ta deseá pa e proyekto di mil baka aki bira realidat. E proyekto lo tuma 1 aña i mei pa terminá, p’esei nos ta urgí Minister di Ekonomia pa pone kos kana, meskos ku a duna e.o. CORENDON e pèrmitnan nesesario pa konstruí i ópera, promé ku e mil baka nan hoga na pos.