E di 15 edishon di Ride Swim Sail & Walk for the Roses otro biaha eksitoso

73
WILLEMSTAD – Apesar ku e total kandidat di partisipante a baha un krenchi, fundashon Ride for the Roses Curaçao (RFTRC) un biaha mas por wak bèk ku satisfakshon riba e edishon di hubilo di Ride, Swim, Sail & Walk for the Roses.

 

Ku tur e aktividatnan ku ta forma parti di dje, inkluso Golf for the Roses, e kantidat di partisipante ta serka di 8500. E fondonan generá ku e aktividatnan aki, huntu ku e kontribushon di patrosinadornan i Golf for the Roses, lo alkansá tòg den kareda di 450.000 florin. Den esei no a konta ainda e loke e akshon di Standing Order di Curd Evertsz a generá for di mart 2018 te awe. Esei ta impliká ku komunidat di Kòrsou di bon kurason a bolbe pone un suma supstansial disponibel pa e lucha kontra kanser den man di fondo Prinsesa Wilhelmina (PWF). Mester apuntá ademas ku den kuadro di e aña di hubilo den kurso di e aña aki tin mas aktividat planiá pa generá fondo adishonal. Na su debido tempu lo anunsiá mas di esei.

Señal di salida
Djis despues di 7 or di mainta, e promé presidente i ko-fundador di RFTRC Rob Blaauw a duna e señal di salida pa e Walk for the Roses, un ruta di 7.8 kilometer ku a pasa riba e brùg haltu Juliana pa atraves di Waaigat, Pèn i Mari Pompun kaba na Mambo Beach/BLVD. Tabatin tambe un ruta alternativo di 5 km pa kana for di Awasá riba brùg Emma pa Mambo Beach/BLVD. Na yegada e partisipantenan a risibí un bunita rosa; esei tabata warda e partisipantenan na e otro partinan deportivo tambe.

E kuater elementonan di korementu di baiskel a kana mes zetá. Miéntras ku e kanadónan tabata drentando, poko despues di 8 or, riba instrukshon di e anterior miembro di direktiva Marcel Thoonen, e promé grupo di koredó di baiskel a sali pa e ruta di 40 i 60 km, eskoltá pa polis riba motosaikel. Djis despues a sigui e kareda Easy Ride di 10 km, pa Punda i bèk, i komo último e kareda pa mountain bikes. Salida i final di tur tabata na Mambo Beach/BLVD.

Landamentu
Aki un di e fundadornan i miembronan di direktiva di promé ora Sigmund Jansen a duna e señal di salida. E promé landadónan di kompetensia a drenta despues di poko mas ku mei ora na Mambo Beach/BLVD. Henter dia tabatin hopi aktividat, músika i un bon ambiente na e playa di Mambo Beach. Despues a kuminsá pone tur kos bèk na òrdu pa entregá Mambo Beach/BLVD bèk limpi i bunita.