Fanty Music ku dos kantante den Festival di Tumba di Kòrsou

151
Nan ta bin duru aden den Tumba 49.

WILLEMSTAD,—-Ayera durante di un rueda di prensa na Boneiru agrupashon musikal Fanty Music a anunsiá nan kantante nan ku nan ta bai partisipá kuné den festival di Tumba na Kòrsou, e tres kantante nan ta MC Lady Lava i Danny Yanga.

Nos tin ku bisa ku esaki ta pa promé biaha ku un agrupashon musikal di Boneiru ta partisipá den festival di Tumba di Kòrsou, ya tin algun aña ku e banda di Aruba Buleria ta partisipando den nos festival di Tumba i ku aña pasa nan a kompaña Rei di Tumba 2018 ku ta Urvin “Luwi”Jano.

Tambe nos tin ku bisa ku durante di e rueda di prensa presidente di A.M.A.K. Feko Gomes a hiba palabra, e la bisa ku “Mi ta hopi kontentu ku Boneiru tambe tin un agrupashon musikal ku ta bai partisipá den Festival di Tumba di Kòrsou, esaki ta mustra ku Tumba ta su sanger ta kore tur kaminda”.

Mas aleu tambe tabata na Boneiru Kòrá Faneite komo invitashon spesial, e tambe a trese su pensamentu dilanti rondó di partisipashon di agrupashon musikal Fanty Music den festival di Tumba di Kòrsou. E la bisa lo siguiente “ Ta un plaser pa mira un banda di mi pais partisipá den Festival di Tumba di Kòrsou, ku ta e festival di Mas Grandi den Reino Hulandes, t’asina ku e aña aki e festival ta selebrá su di 49 edishon i ta trata aki di un festival riba un nivel hopi haltu. I awor un banda di Boneiru tambe ta forma parti di festival di Tumba na Kòrsou. Un pabien ta bai na kada un Boneriano, paso esaki sin duda ta un logra musikal hopi grandi i ta algun ku mester keda marka den buki di historia”.