Hòmber ta baha kore bai laga shotgun den outo

E la laga su telefòn ku su potrèt riba dje

2995
Willemstad— E mihó kos ta pa e shofùr mes bai entrega su mes na Polis ya ku klaramente e la wòrdu identifiká debí ku awor ta busk’é pa violashon di e lei di arma.

Djasabra den oranan di anochi Polis a bin topa ku un vehíkulo ku nèt tabata koriendo den e direkshon prohibí den Belvederestraat na Otrobanda. Na momento ku a dun’é señal pa para pa asina por atendé riba loke ku e tabata hasiendo esaki mester a dera tròt i kore bai. A sigui ku un persekushon den e kayanan smal di  Domi abou. Tabata na altura di Volksbondstraat e  vehíkulo mester a dal kontra di e un kura di kas unda e shofùr a baha for di esaki i bula den e kura di santana i kore limpi bai. Ora ku polis a bai wak den e outo a bin topa ku un shotgun hinka den banda di e porta i tambe un bala pa shotgun. Den su hansha e shofùr a kore bai laga su telefon ku su potrèt ariba dje. Polis mesora a konfiská tantu e vehíkulo komo e arma pa mas investigashon. Un sugerensia ta bai na e sospechoso pa e entrega na Polis ya ku e ta klaramente identifiká.