Hopi hende na Kòrsou desepshoná Seri di Karibe 2019 lo tuma lugá na Panamá

95
Awor e Seri di Karibe di 2019 lo tuma lugá di 4 pa 10 di febrüari den e stadion nashonal Rod Carew di e siudat Panamá. E stadion Rod Carew tin kapasidat pa 27 mil fanátiko.
Willemstad,– Hopi ta e yunan di Kòrsou ku a prepará i hasta a paga ticket i reserva Hotèl pa bai wak e weganan di Seri di Karibe na Barquisimeto.

Mirando e echo ku e ekipo di Lara ku ta di Barquisimeto a titulá kampion na Venezuela, esaki sigur lo a bira un fiesta total aya na Barquisimeto.

Awor e Seri di Karibe di 2019 lo tuma lugá di 4 pa 10 di febrüari den e stadion nashonal Rod Carew di e siudat Panamá, asina e Konfederashon di Beisbòl Profeshonal di Karibe (CBPC) a anunsiá ayera.

“Despues di hopi esfuerso nos lo hunga e weganan di Seri di Karibe 2019 na e siudat di Panamá. Tur e paisnan di e Konfederashon i tambe Panama lo hunga”, asina e komishonado di beisbòl di Karibe, Juan Francisco Puello Herrera a bisa.

E evento ku tur aña ta hunga ku e ekiponan kampion di e torneo di beisbòl invernal di Mexico, Cuba, Puerto Rico, Repúblika Dominikana i Venezuela, tabata programá originalmente pa hunga den e stadion Antonio Herrera Gutiérrez di Barquisimeto, Venezuela, pero a muda di emergensia debí na e krísis polítiko ku ta biba den e pais suramerikano for di siman pasa.

E stadion Rod Carew tin kapasidat pa 27 mil fanátiko, seis ekipo lo kompetí i esakinan ta: Leñadores de Las Tunas (Cuba), Estrellas Orientales (Repúblika Dominikana), Cangrejeros de Santurce (Puerto Rico), Cardenales de Lara (Venezuela), Toros de Herrera (Panamá) e e ganadó di e seri final di e liga mehikano kaminda ku e ekipo Charros de Jalisco ta ganando e seri 3-2 riba Yaquis de Obregón.

“Tabata un evento traumatiko pa haña un sede alternativo, pero danki Dios e trabounan a duna fruta. Nos a siña un lès mas: Nos tin mas lugá di loke anteriormente nos tabata konsiderá”, asina e direktiva di e Konfederashon di Karibe a bisa.

Cuba lo enfrentá Repúblika Dominikana den e wega inougural, miéntras ku Panamá lo debutá den e di dos dia di akshon.

Pa di dos aña konsekutivo CBPC mester a retirá e sede di Seri di Karibe for di Barquisimeto. Aña pasa e torneo a muda pa e siudat Guadalajara, México, pero kontrali na e biaha aki, e desishon a ser tuma vários luna delantá. Den e último 50 añanan, e evento a keda kanselá solamente na 1981, tempu ku tambe e tabata korespondé na Venezuela pa a organis’é.