Karta di Rhuggenaath na Rutte ta konfirmá inkapasidat di ministernan di MAN

2116
Punda—Kòrsou no tin kapasidat pa manehá su mes finansa públiko. Esaki ta lokual por konkluí fo’i un karta di Rhuggenaath a manda pa Mark Rutte for di ougùstùs 2018 miéntras na òktober 2018, Raymond Gradus ta menshoná un trayekto adishonal di 2 aña ku Cft tei imponé kondishon pa Kòrsou.

E desishon di supervishon adishonal ta wòrdu imponé durante 2 aña di tempu. Gobièrnu di Ulanda i di Kòrsou a trata na pone esaki den un bachi dòrná pero al final si kompará lokual a sosodé siman pasá, e karta di Rhuggenaath i dos rueda di prensa di Gradus i Gijsbertha na òktober, mas medida tei bini pa Kòrsou.  Dos siman pasá, Sekretario di estado pa asuntunan interior na ulanda, Raymond Knops den un karta pa parlamento ulandes a manda informá Den Haag ku Kòrsou lo ta bou di supervishon finansiero 3 aña mas. E karta di Knops un biaha mas ta demostrá e défisit demokrátiko riba kos isla.

Knops a basa su karta riba e hecho ku e Komishon di Evaluashon pa e Lei di Konsenso Finansiero a finalisá nan ronda di sondeo. Presidente di e Komishon di evaluashon, apuntá pa Hulanda, Mark Dierikx a entrega e rapòrt final na “onze ministers”. E rapòrt ta konkluí ku tantu Kòrsou komo St. Maarten no a “comply” ku eksigenshanan stipulá den e lei di konsenso finansiero 2010. E rapòrt lo bai pa konseho di minister di reino, lokual tei bira un prolongashon pa 3 aña mas di supervishon finansiero ulandes. E personahe mas prinsipal den e komishon ta e konsultent ulandes Mark Dierikx. Dierikx ta un konsultent ku ta empleá na un ofisina di eksperto gubernamental ABDTopconsult. Ta trata di un ofisina di konsulta finansiá pa Asuntunan Interno di Gobièrnu Ulandes. E ofisina aki ta enkargá pa solushoná problemanan pa por benefisiá Ulanda den Reino Ulandes.