Kaminda Hensley Muelens na unda polis a blòkia e vehíkulo pa asina por a para esaki.
Willemstad— Den oranan di mardugá polis a logra di para un vehíkulo den kual tabatin vários latino i tambe un kantidat di djùk yena ku gasolin.

Djadumingu den oranan di mardugá un patruya di Polis atento a tuma nota di un trùk yena ku djùknan di gasolin i algun hòmber sinta den e baki. Mesora a logra di para e vehíkulo pa asina por a hasi e demas investigashon. Den e kaso aki tabata trata di algun latino ku segun nan vershon a kaba di yega for di Venezuela na unda nan a bai pa buska boto. Segun e latinonan nan lo a bini ku tres boto i a logra di mara esakinan den haf. Nan  no por a registrá nada debí ku ya na e momento ei e parti di imigrashon tabata sera. A kontrolá e vehíkulo i a tuma nota ku esaki su dokumentonan no tabata na òrdu. A splika tur esnan ku tabata den e trùk ku no por sigui ku e djùknan yena ku gasolin i lo konfiská esakinan pa mas investigashon. A tuma pasport di tur hende ku tabata den e trùk pa den oranan di mainta nan pasa na imigrashon unda lo kontinuá ku e parti di registro.