Sendly Sendar ku un tremendo show riba freewind

165
E tambe lo bai tei djamars awor riba Freewind.

WILLEMSTAD,—-Otro siman djamars lo bai tin un tremendo show musikal riba Freewinds. Mester bisa ku Freewind ta saka su man sigur tres biaha pa aña pa yuda e kabayero Sendly Sendar, kende ta un persona  ku sierto desabilidat, pero ku tin hopi gana di traha.

Sendly Sendar, no opstante su difikultat, tin masha pashon pa traha ku artista i e ta gusta organisá su eventonan i asina haña entrada pa e biba. Ya na diferente okashon Freewinds tambe a duna nan aporte na Sendly huntu ku tur e artistanan ku ya konosé e hóben aki i ku ta den e show aki.

Djamars awor dia 29 lo tin un tremendo konsierto titulá “Prime Concert” ku tres kantante masha kerí den farándula. Nan ta Kenneth Hooi, e rei di músika Kòmbèk kende e anochi aki lo kanta tantu su so komo ku Melania vander Veen.

Aparte di kanta ku Kenneth, Melania van der Veen lo tin un repertorio spesial e anochi aki pa karisiá tur presente su oidonan. Huntu ku  nan lo tei nos máksimo bolerista Dennis Cecilia. Anto huntu ku e tres kantantenan aki lo tei tambe Mariachi “Mil Amores”.E anochi aki lo tin un sorpresa masha agradabel.