Den un estado basta krítiko a transportá e víktima pa Poli na unda e la bin fayesé mas despues.
Willemstad—No a pasa masha dia ku Kòrsou a registrá su di dos morto den tráfiko pa e aña aki.

Djadumingu 27 di yanüari 2019, alrededor di 22.33’or, Sentral di Polis a risibí informashon di un aksidente di tráfiko ku a tuma lugá riba Sta. Rosaweg.

Na yegada di e unidat, nan a bin topa un hòmber drumi abou ku leshonnan grave.

A pidi presensia di ambulans na e sitio, ku a transportá e víktima den un situashon hopi delikado pa poliklínika.

Alrededor di 01.55 ’or Sentral di Polis a risibí notifikashon, ku e víktima a bin fayesé, a konsekuensia di e leshonnan ku el a risibí.

For di investigashon preliminar ku polis a realisá na e sitio, a sali na kla, ku e hòmber a bai krusa kaya, na momentu ku un vehíkulo tabata aserkando, biniendo for di direkshon di Sta. Rosa i bayendo den direkshon di Zuikertuintje.

E vehíkulo a dal e peaton aki, lagando esaki den un situashon grave. E víktima maskulino ku tabata envolví den e aksidente di tráfiko ku a tuma lugá djadumingu 27 di yanüari último i ku a fayesé,   a keda identifiká komo:

  • Israel Alfonso Colina Gutierrez, nasé na Venezuela 26 òktober 1977.

Personal di tráfiko ta kontinuá ku e investigashon. Di parti di Vigilante ta bai palabranan di kondolensia na famia di e defuntu ku pèrdida di nan ser kerí. Pas na su restunan.