Komunidat: Retonan ku komunidat ta konfrontando, manera preshon demográfiko, kuestion energétiko, e problemátika di sushi, kontaminashon di airu i kresementu duradero.
Piscadera– Ofisina Sentral di Statistik ta duna di konosé ku a kaba di publiká e di dos edishon di e publikashon ku tin komo tema estadistiká di medio ambiente: Curaçao Environmental Statistics Compendium 2017 (Kombenio di Statistik Ambiental Kòrsou 2017). E publikashon akí ta kontené informashon, tabèl i grafik riba tema ligá ku estadistika di e medio ambiente aki na Kòrsou, basá riba dato di te ku aña 2017.

Ku e publikashon aki CBS ta respondé na e nesesidat kada bes mas grandi ku ta eksistí di risibí informashon riba e tereno akí, i tambe na e retonan ku komunidat ta konfrontando, manera preshon demográfiko, kuestion energétiko, e problemátika di sushi, kontaminashon di airu, kresementu duradero, produkshon di awa i koriente etc.

Un kombenio, manera esun akí di statistik ambiental, ta un dokumento ku ta ofresé djis un poko informashon riba un gran variedat di tema. E kombenio akí ta basá riba un metodologia ku Nashonnan Uní ta usa internashonalmente, konosí komo FDES (Framework for the Development of Environmental Statistics), pero adaptá pa Kòrsou. E intenshon ta pa tur aña publiká un edishon nobo ku update di e sifranan pa e aña mas resien ku tin disponibel.

For di e página inisial, por download Curacao Environmental Statistics Compendium 2017. CBS ta gradisí tur persona i instansia mashá pa nan kolaborashon i aporte na e publikashon akí.