Hóben rabiá ku banko a kita mas di 2 mion poné riba su kuenta

Segun  e hóben mester a pone na altura ku ta mishi ku su kuenta

3558

Willemstad— Vigilante a haña reakshon di un hóben ku banko a mishi ku su kuenta sin a tuma kontakto kuné.

 

Segun e hóben e tin un kuenta bankario na un banko lokal.  Tabata siman pasa ora e la bai kontrolá su kuenta bankario manera e sa hasi kasi semper e la bin tuma nota di un suma mionario riba su kuenta. Segun e hóben e la tuma nota di mas ku 2 mion florin riba su kuenta. Den ménos ku dos pa tres dia e la bin tuma nota ku e suma mionario a disparsé. E hóben a sigui splika mesora e la drenta den kontakto ku un famia di dje ku tambe ta traha den e mundu bankario ku a bai hasi mas investigashon pe.  Segun e hóben a bin resultá ku trahadónan di un manera òf otro mester a hasi un fayo durante transakshon i a pone e suma mionario riba su kuenta. Segun e hóben na niun momento no a pone na altura ku a i tabata mishi ku su kuenta bankario pa asina por a kita e montante bek for di su kuenta. Pa esaki e ta hopi rabia ku e banko.  E hóben na final a splika ku tabata pa nèt tres dia e tabata un mionario.