Hòmber di edat morto bentá den mondi  ku vários hinká

Riba e tereno na Baya Beach

873
Aria di Baya a ser será pa mas investigashon.
Willemstad—-  E luna aki Kòrsou a registrá su di dos kaso di asesinato ora a bin topa ku un kurpa sin bida benta den e pida mondi riba e tereno di Baya Beach.

Djamars 29 di yanüari 2019, alrededor di 08.16 or, Sentral di Polis a risibí notifikashon ku den un buraku banda di un brùg den área di Baya Beach tin un hòmber drumí ku probablemente no ta duna señal di bida. Mesora Sentral a dirigí unidatnan na e sitio. Na yegada di e patruya, e agentenan a tuma nota di un persona di edat, di sekso maskulino ku vários hinká na e parti ariba di su kurpa drumí den e buraku. Ta trata di un hòmber di edat koló skur, kabei pelá plat i ku postura normal. Tambe por a tuma nota ku e ta disponé di un mustashi. A ripara ku e víktima no tabata disponé di un flanèl na e parti ariba di su kurpa i tampoko e no tabatin nada bisti na su pia. Den su man e tabatin un telefon tene.  Tambe a tuma nota ku su testíkulo tabata kòrtá i  for di su karson. Djis den serkania  unda a bin topa ku e kurpa sin bida a bin haña un karson tur na mancha di sanger i tambe por a mira markanan di tayer ku ta duna e indikashon ku un vehíkulo mester a skuer bai for di e sitio. E karson aki sigur ta duna e indikashon ku e sospechoso lo a bandoná e sitio sin su karson òf e lo tabatin un otro mas bisti.  E tim Forensiko ku a presentá na e sitio pa por a hasi e demas investigashon a pidi yudansa di e tim di reskate di Brantwer pa asina por a habri un kaminda pa yega na e kadaver i tambe pa yuda saka e víktima for di den e buraku unda e tabata drumi pechu ariba.

E buraku na unda a bin topa ku e hòmber asesiná.

Alrededor di 09.45 or dòkter di polis ku a presentá na e sitio, a konstatá morto di e hòmber.

Riba òrdu di Fiskal di Ministerio Públiko a konfiská e kurpa sin bida pa mas investigashon. Tur hende ku por sa algu di e suseso aki por tuma kontakto ku Polis na e numbernan 917 i òf esun anónimo ku ta 108. Di parti di Vigilante ta bai palabranan di kondolensia na famia di e defuntu ku pèrdida di nan ser kerí.