Minister sr. Steven Martina huntu ku sr. Albert Zwueste, sr. Angelo Harms, e agente Armada den presensia di Sr. Stanley Hinds, Sr. Don Panneflek i tambe Sra. Sanchez a hasi e interkambio di plakat ku Kapitan di e barku krusero.
Fort Nassauweg– Djasabra último e barku krusero Nieuw Statendam di Holland America Line a hasi su bishita na Kòrsou pa promé biaha i el a mara na Mega pir Jackie Voges. E barku aki ta bastante nobo tabata 6 di desèmber 2017 ku a lans’é i ku Oprah Winfrey a batis’é.

Manera ta kustumber ora un barku krusero bishitá Kòrsou pa promé biaha, e kapitan i su tripulantenan ta invitá dignatarionan pa un seremonia inougural. Den presensia di Minister di Desaroyo Ekonómiko, Sr. Steven Martina huntu ku COO di Curaçao Ports Authority, Sr. Albert Zwueste, Digital Marketing Manager di Curaçao Tourist Board, Sr. Angelo Harms, e agente Armada den presensia di Sr. Stanley Hinds, Sr. Don Panneflek di Ministerio di Desaroyo Ekonómiko i tambe Sra. Sanchez di Duana, a hasi e interkambio di plakat ku Kapitan di e barku krusero.

E barku krusero a sali Fort Lauderdale dia 13 di yanüari último, i el a sigui pa Bahamas, Puerto Rico, St. Thomas, Grand Turk, Santo Domingo i Boneiru, bini Kòrsou pa sigui pa Aruba i bolbe Fort Lauderdale 30 di yanüari.  E barku tin un kapasidat máksimo di 2650 pasahero krusero i 1025 miembro di tripulashon. E barku tin un largura di 297 meter i un tonahe bruto di 99.500 (GRT). E barku aki ta registrá den kadaster di Kòrsou bou di e asina yamá ‘eigendomsregistratie’, pero ta nabegá bou di bandera Hulandes.