Polis ta start investigashon relashoná ku eksploshon Den Haag

71
27 kas a keda evakuá; ekspertonan forensiko a start investigashon
DEN HAAG—Djaluna mainta polis a start e investigashon relashoná ku e eksploshon den Jan Heijdenstraat na Den Haag di djadumingu.

Apesar ku aktualmente e kousa ta parse un eksploshon di gas, polis ta tene kuenta ku tur senario. Ta trata di un investigashon grandi bou di mando di fiskal pasobra e impakto di e eksploshon meimei di bario tabata enorme. Ekspertonan forensiko a start investigashon den e edifisio ayera. Asina e investigashon ta kla por duna e kasnan pa reparashon. 10 hende a keda heridá den e eksploshon di kua 8 mester a keda transportá pa hospital. Un hòmber di 28 aña a keda reskatá te mei anochi for di e ruina. Pa medidanan di seguridat a evakuá 27 kas despues di e eksploshon. Alrededor di 30 persona a pasa nochi den un hotel. Burgemeester Pauline Krikke a bishita e habitantenan djaluna. E daño total no ta konosí ainda. Fundashon Salvage a instalá un sentro di informashon pa aseguradonan. Habitantenan mes por tuma kontakto ku nan kompania di seguro tambe segun e munisipio.