Si esaki lo kondusí na elekshonnan nobo i demokrátiko Promé minister dispuesto pa rekonosé Guaidó komo presidente interino di Venezuela

2212
Promé minister Eugene Rhuggenaath ta bisa ku Venezuela ta i lo keda un pais ruman importante pa Kòrsou dor di nos lasonan históriko, kultural, sosial, ekonómiko i familiar estrecho ku nos ta mantené ku Venezuela.
Willemstad,– Riba 23 di yanüari último, pueblo di Venezuela a subi kaya masalmente pa eksihí demokrasia den nan pais.

Esaki ta un yamada komprendibel ku no por keda ignorá. Desafortunadamente, durante e manifestashon outoridatnan a respondé ku violensia innesesario ku a resultá den mortonan trágiko di vários hende i un kantidat grandi di persona heridá i arestá. Kòrsou pa medio di e minister di asuntunan general, señor Eugene Rhuggenaath ta kondená tur forma di violensia i ta urgí outoridatnan Venezolano pa garantisá seguridat di pueblo Venezolano i respetá tur derecho humano, i spesífikamente e derechi pa manifestá. Kòrsou ta keda profundamente preokupá pa e krísis polítiko i humanitario na Venezuela i e impakto ku esaki tin riba nos komunidat.

Riba 10 di yanüari, presidente Nicolás Maduro a huramentá pa un segundo mandato. Kòrsou no a rekonosé e resultado di elekshon na 20 di mei 2018, komo ku e elekshon no tabata liber, hustu, ni konfiabel. Konsekuentemente, e Gobièrnu Venezolano aktual falta legitimidat demokrátiko; esta ku e ta elihí pa voto popular den un elekshon liber, ku partisipashon di tur partido. P’e motibu ei Kòrsou no a rekonosé e resultado di elekshon ni tabata presente na e inougurashon.

Kòrsou si a duna sosten na e “Asamblea Nacional” (Parlamento di Venezuela) i su presidente Juan Guaidó. Na e momento aki, e parlamento di Venezuela ta e úniko institushon legítimo i demokrátiko na Venezuela. Entretantu Juan Guaidó a proklamá su mes komo presidente interino di Venezuela. Kontrali na Maduro, Guaidó a demostrá di ta dispuesto pa yama elekshonnan nobo. Promé minister Rhuggenaath ta bisa di ta dispuesto pa rekonosé Guaidó komo presidente interino di Venezuela si esaki lo kondusí na elekshonnan nobo i demokrátiko. Ta na e pueblo Venezolano pa eligí di un manera demokrátiko i pa medio di elekshonnan liber, transparente i konfiabel, su propio gobièrnu.

For di kuminsamentu Kòrsou ta boga pa un solushon pasífiko ku ta inkluí tur partido Venezolano, pa asina restourá pas, stabilidat i demokrasia na Venezuela. Kòrsou ta implorá tur embolbí pa pone un punto tras di e violensia innesesario, restourá pas i trankilidat, yama elekshonnan demokrátiko, i laga yudansa humanitario drenta e pais. Kòrsou ta dispuesto den e kuadro aki pa fungi komo ‘hub’ humanitario.

Gobièrnu di Kòrsou ta sigui e desaroyonan na Venezuela di aserka kontinuamente. Tambe tin vários departamento di gobièrnu ku ta reuní regularmente pa interkambiá informashon ku otro, entre otro pa prepará plannan di kontingensia pa atendé ku posibel riesgo i situashonnan ku por surgi. Den Reino, tambe tin kontakto estrecho riba tantu nivel polítiko komo nivel di departamentu gubernamental.

Venezuela ta i lo keda un pais ruman importante pa Kòrsou dor di nos lasonan históriko, kultural, sosial, ekonómiko i familiar estrecho ku nos ta mantené ku Venezuela. Gobièrnu di Kòrsou lo sali semper na vanguardia di interesnan i siguridat di pueblo di Kòrsou den nos deliberashonnan den Reino i ku Venezuela.

“Nos konosé nos rumannan na Venezuela komo hende ku pashon i hopi amor pa nan patria. P’esei Kòrsou ta spera di kurason ku pronto lo yega na un solushon pasífiko kaminda por restourá pas i trankilidat i ku e pueblo Venezolano i e suidadanonan Venezolano ku ta biba den eksterior por bolbe konta ku tempunan mihó den futuro serkano”, asina promé minister a duna di konosé.