Tres morto i mas di 170 herido den tornado registrá na La Habana

91
Destrukshon ku a keda atras ku paso di e tornado.

LA HABANA – Un fuerte tempestat a asotá Cuba den oranan di djadumingu anochi i mardugá di djaluna, lagando saldo di tres morto i otro 172 persona heridá, ademas di vários derumbe i inundashonnan. Tur esaki despues di paso di un fuerte tornado.

E presidente kubano, Miguel Diaz-Canel, a realisá un rekorido den e zonanan afektá i a señalá via di su kuenta di Twitter ku e dañonan ta severo i ku te ainda a lamentá pèrdida di bida di tres persona.

Un liña di tormenta intenso a destabilisá e klima na oksidente kubano, provokando daño na e infrastruktura i tambe pèrdida di koriente. Esaki inkluyendo un tornado ku a azotá e kapital, La Habana.

For di oranan trempan di djadumingu, un mal tempu prosedente di Golfo de México a kuminsá drenta den e provinsia di Pinar del Rio ku un forsa inusual pa e époka. Esaki a trese kuné bientunan di asta 70 mia pa ora.

Defensa Sivil a emití un alerta na e poblashon, relashoná ku violensia di e klima, pero poko kubano, prinsipalmente na La Habana, tabata kla pa e violensia intenso di bientunan i áwaseru. Esaki a konkluí den un tornado ku a gòlpia zonanan di e kapital lagando derumbe, destrukshon i vehíkulonan boka abou.

E mayor forsa di bientu a keda sintí na La Habana entre 8.45 i 9.45 di anochi, na momentu ku e kapital a keda den skuridat total. E servisio eléktriko a kuminsá keda restablesé bèk poko poko, pero tòg ainda tin vários área sin koriente.

E tornado a afektá algun munisipio di e kapital manera entre otro Diez de Octubre, Santos Suarez, Luyanó, Regla, Chivas i tambe Celimar.