Empleadonan Damen ta pone preshon pa CAO keda reglá

240
Nieuwehaven- Ayera den oranan trempan di mainta trahadónan di Damen mester a drenta akshon i blòkia entrada na Dokweg.  Esaki debí ku ya tin algun luna kaba ku nan CAO mester a keda regla pero esaki no ta kla. Mester a yega na un fecha nobo pa esaki pero a tarda kuné.

For di dia a sinta Damen a pidi un tempu pa kaba esaki, pero e persona ku ta hasi e parti di e CAO ta un persona ku ta biba for di pais i a bira malu i pone ku kosnan a pega.

Parti di e CAO tabata kla i a keda presentá na e trahadónan, pero nan no a aseptá esaki. E parti salarial no tabata kla i esaki ta e parti integral den e CAO. A pidi un lapso di 6 luna pa por kaba kuné i ku e fecha tabata 1 desèmber 2018. Na momentu ku e fecha a yega esaki tampoko no tabata kla. E trahadónan tabata ke un aklarashon pa sa ki dia e CAO lo ta kla i p’esei mes nan a aserka nan sindikato PWFC pa asina tende kiko ta bai pasa. Ku e kontesta ku nan mester a haña serka e sindikato no tabata dje satisfaktorio ei pa nan i a pone ku nan a kanta akshon ayera for di oranan trempan di mainta. Esaki a pone ku sindikato di PWFC huntu ku gerensia i Damen a reuní i asina wak na ki akuerdo por yega. Den promé instante gerensia di Damen a duna di konosé ku e persona ku ta atendé e CAO lo por yega dia 11di Febrüari awor, e sindikato a bisa ku esaki ta muchu lat i ku mester ta mas promé. Esei a pone ku e persona aki lo tei pa djaluna awor dia 4 di Febrüari pa por kuminsá ku e trabounan pa por kaba ku e CAO pa e trahadónan por haña esaki.

Tambe nan a toka e punto di e sèn ku a keda kita i ku a bai e fondo di spar, despues ku Damen a para e fondo aki. Esaki tabata un fondo di spar kaminda Damen tabata spar 3 porshento pa e trahadó i e sobra e trahadó mes tabata pone kuantu e tabata deseá. A para esaki i a kombertí e fondo di spar den un penshun. Esei tambe nan ke sa ki dia nan ta haña e sèn ku a keda kita bek.  Despues di tabata den akshon den oranan di mainta e trahadónan di Damen a regresá nan boka di trabou i ku pa djaluna nan no haña un kontesta satisfaktorio na lo drenta bèk den akshon.