Gran Tumbero Ronny Winklaar no ta huntu ku nos mas

404
E tambe ta parti di e fundeshi di Festival di Tumba.

WILLEMSTAD,—-Ayera mainta ‘E Mulina’, a haña e tristu notisia ku e gran Tumbero Ronny Winklaar no ta huntu ku nos mas. ‘E Mulina’, mester bisa ku Ronny Winklaar tabata un Tumbero hopi popular den dékada 80 i 90, hopi di su Tumba nan a dal duru tantu den Stadion di SUBT  i tambe den Curaçao Festival Center.

Awe nos ta bai para ketu un ratu riba e historia di Ronny Winklaar den Festival di Tumba. E kantante a kuminsá partisipá na aña 1976 ku agrupashon musikal Latin Five Combo, su Tumba tabata yama “Bin Gosa nos Karnaval”, ta trata aki di su mes un komposishon. Na kuater okashon e ta partisipá ku agrupashon musikal Explosion Latina i esaki nan ta na aña 1980 ku su komposishon “Até kos gos’e”, na 1981 ku e Tumba “Mi ta drenta den”, na 1982 e la partisipá ku un Tumba ku a dal hopi duru e aña ei ku ta “Ba spera ma yega”, 1983 ku otro komposishon ku tambe a dal duru ku ta “Ban ku mi sėngenė” na 1984 e ta bolbe partisipá ku e komposishon “Kòrsou, ki grandi bo ta” e aña ei e la presentá ku  agrupashon musikal Tunel Miners.  Na 1985 Ronny ta partisipá ku e banda Piña Colada ku su komposishon “Bo tin ku move kuné”. Na 1987 e kantante ta bai ku Grupo Mas kaminda ku e la presentá otro di su gran komposishon nan ku ta “Nami un punt’ey”.  1988 Ronny ta bolbe presentá ku e banda Grupo Nan ku e Tumba “Pasaat ta supla”, na 1989 e kantante ta bai ku e banda “SI” aki nan e la kanta e Tumba “Wante ku prèkè”. Na 1991 Ronny ta presentá ku e agrupashon musikal Arnell i su Orkesta ku su komposishon “E Momentu a yega”, 1993 e ta bolbe bai ku Arnell i su Orkesta kaminda e la presentá e Tumba “Ta nos tesoro”. Na 1996 Ronny Winklaar ta partisipá ku e banda Muzik School Maria Cornelia ku su komposishon “Ankra den nos pais”. 1998 e ta bai ku Doble R SSS ku e Tumba “Mi pret’i wowo”, i su último partisipashon tabata na anda 2004 ku Doble R SSS ku su komposishon “B’a seba ei den”.

Nos tin ku bisa ku na aña 2004 Ronny Winklaar a retirá tambe for di Festival di Tumba , na tur e gran kantante Ronny a klasifiká 15 biaha, ta trata aki di un kantante ku sigur a marka su nòmber den Stadion di SUBT, SDK i den Curaçao Festival Center, i no lubidá mes riba su promé partisipá na aña 1976 den Roxi. Ronny Winklaar tambe a forma e fundeshi di Festival di Tumba. Den e forma aki Nos ta Deseá su yunan i demas famia forsa pa ku e pèrdida.