Insel Air tin bida riba mashin di oksígeno

295
Kurator Rogier vd Huevel
Punda—Insel Air ta na bida riba mashin di oksígeno. Tur kos ta defendé kon lihé e kompania di aviashon tei risibí un pago di 500 mil dòler for di InterCaribbean Airways. Entrentantu e posishon di likides di Insel Air ta nulo sin por paga gastunan operashonal. Un veredikto sivil ayera despues di un wisio sumario, a kompliká e kosnan mas tantu pa ámbos kompania.
Michael Bonapart

Ayera wes mr Rijen a ordená Insel Air pa eliminá un beslag ku nan a laga pone riba diesel den un avion di InterCaribean stashoná na St. Maarten. Sin e diesel en kestion e avion no por move i korte ta haña ku InterCaribbean ta sufri demasiado daño si paralisá e aparato. Pero na mesun momento, Korte alabes a disidí ku InterCaribbean mester paga e multa imponé pa korte riba 28 di desèmber último. E multa ta enserá ku InterCaribbean mester paga Insel Air un suma di 500 mil dòler estado unidense miéntras e no pone sufisiente garantia riba mesa pa asertá e Akuerdo di Kréditornan. Esaki ta nifiká ku tantu Insel Air komo InterCaribbean ta den un wega di Dos Kabes sin salida. Na promé lugá, InterCaribbean mester paga mei mion dòler na Insel Air òf duna 11 mion dòler na garantia pa tuma akshon di Insel Air. Na di dos lugá, InterCaribbean a apelá e desishon pa e pago di mei mion dòler tambe. Riba esaki, Korte ayera no a bai den detaye i splika ku ta komprendibel si InterCaribbean paga Insel Air e mei mion dòler, ta nifiká ku esaki ta sèn tira den saku sin un bòm.

Pa Insel Air e situashon ta sumamente peligroso, pasobra InterCaribbean por gèmbel na keda sin paga e mei mion florin i wak kuantu tempu Insel Air tei wanta promé ku nan bai bankarota. Esaki ta nifiká ku asertashon di e akuerdo di kréditornan ya no ta bálido mas  awor ku Insel Air a rechasá esaki i demandá InterCaribbean na pone e garantia di 11 mion dòler konforme nan MOU ku InterCaribbean. Entretantu ta konosí ku Insel Air e dianan aki por kanta grita “non payment” pa mayoria di su aktual kreditornan, miéntras e kreditornan bieu por bien yama ayó. Kestion te bira kuantu Insel Air i InterCaribbean tei wanta. InterCaribbean mester di bula su avion miéntras Insel Air no tin sèn pa sigui ópera su avion i korte di su banda awor tin di bai trata e apelashon di InterCaribbean pa keda sin paga e mei mion dòler.

Un bululú formal ta lokual hinter e negoshashon entre Insel Air i InterCaribbean a resultá. Korte ta opiná ku InterCaribbean mester paga e multa di mei mion florin si e no por bini ku garantia pa asia asertá e akuerdo di kréditornan. Pero na mesun momento, Insel Air a rechasá esaki, lokual ta keda habri pa diskutí ta ehekushon di e akuerdo di entendimentu entre Insel Air i InterCaribbean. Pero e MOU aki no ta sufisiente pa Insel Air por eksihí di su banda ehekushon di pago na 11 mion dòler for di InterCaribbean. Korte den Apelashon sin duda algun lo rechasá esaki unabes Insel Air trese e argumento aki dilanti, alegando ku no ta InterCaribbean su falta ku Insel Air ta práktikamente bankarota. Den transkurso di e dianan aki, ta kestion kua dje kompanianan tei wanta mas largu. InterCaribbean òf  Insel Air. Sea ta paga mei mion florin òf Insel Air ta bai bankarota. Esaki lo nifiká pa InterCaribbean, e kobransa di mei mion florin lo tuma tempu, pero e mester bin pag’é komo parti dje bolsa di bankarota. Tur kos a bira awor un kestion di tempu.