Firma: Den e kuadro aki, University of Curaçao, Algemeen Pensioenfonds van Curaçao i Centraal Bureau voor de Statistiek a firma un konvenio tripartit di koperashon.
Jan Noorduynweg– Tabata djaweps último ku a instalá Profèsòr dr. Onno Steenbeek komo akadémiko ekstraordinario den maneho di fondo di penshun na University of Curaçao. Esaki ta e promé kátedra spesial riba tereno di penshun den Karibe Hulandes. Algemeen Pensioenfonds van Curaçao (APC) ta fasilitá e kátedra pa un periodo di kuater aña.

Konservashon di e sistema di penshun ta un di e retonan mas  grandi ku nan sektor i e komunidat ta para dilanti dje. Preguntanan manera kon nan lo mantené e sistema di penshun pagabel i kon nan lo dil ku e echo ku hende ta biba mas largu ta preguntanan ku ta na órden di dia. Ademas nos ta mira ku e generashon mas hóben ta birando mas krítiko i ta duna un propio interpretashon na nan añanan di penshun. “Tumando nota di e retonan aki den nos komunidat, nan ta nota un oumentu den e nesesidat pa haña i interkambiá mas konosementu. Ku e kátedra spesial aki huntu ku University of Curaçao , APC ta  duna kontenido na un manera struktural den esaki”, asina direktor di APC Evelyn Kruithof-Bor MBA a bisa durante e enkuentro di apertura di e kátedra di penshun djaweps anochi den oula di universidat. Pa mas ku ochenta aña, APC ta hiba un maneho dirigí pa realisá un bon penshun pa su partisipantenan. Pero APC ta fiha tambe riba un grupo mas grandi. “Nan ta konsiente di nan responsabilidat sosial pa ku komunidat i gustosamente nos kier duna kontenido na esaki. Bon enseñansa ta di vital importansia pa desaroyo di un pais i pa e futuro generashon”, sra. Kruithof-Bor a sigui bisa.

E intenshon ta pa ofresé un Programa Ehekutivo ku módulo nan riba e tópikonan manera penshun, invershon, maneho di riesgo i pension governance.  Pa e tópikonan aki lo atraé dosentenan internashonal. Tambe lo tin kursonan pa hendenan ku ta trahando den e sektor di penshun. E direktor di APC a deklará ku no ta partisipantenan di Kòrsou so ta bon biní pero di henter Karibe i Sürnam. “Nanta anhelá pa traha den estrecho koperashon ku nan sosionan den Caribbean Pension Funds Association (CaPAs), ku ta e organisashon ku ta atendé e interesnan di e sektor di penshun den Karibe Hulandes. Di e forma aki nan por kontribuí ku otro den engrandesimentu i ampliashon di e konosementu den nan sektor”.  Sra. Kruithof-Bor a informá ku e intenshon di e kátedra no ta solamente pa enseñansa sino tambe pa hasi investigashon ku e intenshon pa e sektor di penshun, supervisornan i tambe komunidat benefisiá di dje. “Kuantu persona tin un areglo di penshun na Kòrsou i kiko nos por hasi pa stimulá ku mas persona tin sufisiente entrada na momento ku nan yega e edat di penshun?” ta preguntanan relevante. Den e kuadro aki, University of Curaçao, Algemeen Pensioenfonds van Curaçao i Centraal Bureau voor de Statistiek a firma un konvenio tripartit di koperashon.

E kátedra su kontenido ta keda konkretisá dor di Profèsòr dr. Onno Steenbeek. E ta akadémiko Pension Fund Risk Management afiliá na Erasmus Universiteit na Rotterdam. Ademas e ta responsabel pa e Portafolio di Konseho Stratégiko na  APG Asset Management. Profèsòr Steenbeek ta trese eksperensia internashonal amplio pa Kòrsou. E la aseptá su nombramentu komo akadémiko ekstraordinario den maneho di fondo di penshun ku un epílogo inougural titulá ”Retonan di penshun i oportunidatnan na Kòrsou i sobrá di Mundu.”