Miéntras Minister a indiká ku tin skol normal Sitek a kanta wèlga general

395
Stenenkoraal- Ayera den oranan di anochi maestronan di skol Dos a reuní na Sitek despues ku nan keda yama urgente pa atendé e problema di limpiesa na skolnan.

E problema ku a bin dilanti e siman aki ta ku a kòrta den e presupuesto di skolnan DOS pa ku limpiesa di e skolnan. Esaki ta trese kuné ku muchanan mester yega skol i topa ku klasnan  i  bañonan ta shushi. For di djaluna tin skolnan di DOS ku mester a tene e muchanan pafó di klas, paso esakinan ta hopi shushi i no ta apto pa e muchanan haña lès den e situashon aki. Sitek a yama e maestronan despues ku nan a risibí un karta di Ministerio di Enseñansa kaminda a bin dilanti ku awe despues di 12’or di mèrdia lo bin personal di limpiesa pa kuminsá limpia e klas i bañonan.

I ku esaki lo bai tuma lugá 3 bes pa siman pa limpia klas i alabes  2 bes pa siman baño te ku 5 di yüli 2019. Tambe ku lo bin un destaho públiko pa kompanianan di limpiesa. Momentu ku a bin ku e proposishon aki dilanti maestronan di skol no a bai di akuerdo ku esaki, debí ku klas i bañonan mester keda limpia tur dia. Tambe otro punto ku nan a toka ta ku mester limpia kura di skol un biaha pa luna.

A bin dilanti tambe ku den fakansi mester limpia e skolnan i no mishi ku sèn di aktividat di e muchanan. Asina a bin hopi punto mas dilanti ku for di 2016 mester a keda atendé i ku p’esei a kanta wèlga general di skolnan. Tur maestronan di skol ta wòrdu yama pa  reuní awe mainta na Sitek pa atendé e puntonan . Durante di un entrevista ku a ser  tene ku Minister di Enseñansa den e kaso aki señora Alcala Walle e lo mester a indiká ku awe lo tin skol normal manera tur dia ya ku a yega na un areglo ku forsa retroaktivo pa e kompanianan ku ta hasi limpiesa na skol.

Minister a sigui bisa ku ta na momento ku tin fakansi i tambe dianan liber i wikènt so e muchanan por keda sin bai skol i no asina mas Sitek ta lanta bisa ku awe no tin skol. Ta Gobièrnu ta e úniko identidat ku por bisa ora no tin skol. Ku esaki Minister kier a ilustrá ku awe tin skol normal.

Limpiesa na Skolnan Públiko ta kontinuá

Servisio di Skolnan Públiko ta responsabel pa garantisá limpiesa na tur skol públiko. Esta skolnan di gobièrnu.  E kontratonan ku e kompanianan di limpiesa a vense fin di 2018.

Pa 2019 gobièrnu ta kontinuá ku e servisio i e kompanianan di limpiesa ku aktualmente ta brindando limpiesa na e skolnan. E proseso di aprobashon finansiero a finalisá i tur e kompanianan ku ta limpia skol di Servisio di Skolnan Públiko a wòrdu informá ku gobièrnu ta kontinuá ku e limpiesa konforme palabrashon.

E Akuerdo aki ta drenta na vigor ku forsa retroaktivo for 1 yanüari 2019. Pues kompanianan ta kobra nan entrada kuminsando 1 yanüari 2019 manera presupuestá pa 2019.

Ku esaki Ministerio di Enseñansa, Siensia, Kultura & Deporte ta indiká ku e situashon aki tin  debido atenshon di e Ministerio i Servisio di Skolnan Públiko.