Rhuggenaath a entrega mas parti esensial di nos outonomia

Kousa Prome

310
Santa Maria– Pueblo di Kòrsou a respondé masalmente riba e reunion di protesta ku Movementu Kousa Promé a konvoká dia 28 di yanüari último na sentro di bario Santa Maria. Sala a yena ku yunan di Kòrsou ku ke kambio di e mentalidat kolonial di mandatarionan di Kòrsou.

 

Movementu Kousa Promé a splika na plaka chikí kiko ta e rasonnan eksakto ku pueblo mester rechasá e covenant ku minister presidènt Rhuggenaath i su kolega Rutte a firma. Ku su firma minister presidènt Rhuggenaath a entregá un biaha mas parti esensial di nos outonomia na gobièrnu hulandes. Awor ta ámtenarnan haltu i konsultentnan di Hulanda mes ta bin biba i traha na Kòrsou pa prepará i ehekutá proyektonan ekonómiko di kompanianan hulandes riba suela di Kòrsou. Hulanda mester di Kòrsou komo trampolin pa nan hasi negoshi i komersio lukrativo ku Caribe i Latino Amérika. Esaki pa krese ekonomia hulandes i no di Kòrsou.

Movementu Kousa Promé a ekspresá bon kla ku no por sigui aseptá esaki mas. A yega e momentu pa stòp divishon na Kòrsou i ban uni pa sali dilanti komo un bloke patriótiko pa demostrá balor i orguyo propio di e yu di Kòrsou.

Movementu Kousa Promé a lanta na final di e reunion di protesta un Frente Amplio Gobernashon Propio ku mester bira e union di pueblo pa lucha pa un yu di Kòrsou nobo ku no ta tolerá mas ku ta mete ku su outonomia. Un frente amplio pa demostrá ku e yu di Kòrsou tin sufisiente potensial, forsa, sabiduria i konosementu pa goberná Kòrsou i trese prosperidat i bienestar. Tur desaroyo ekonómiko i komersial ku bini den nos pais mester tin benefisio pa yunan di Kòrsou na promé lugá. Movementu Kousa Promé ta rechasá e pensamentu liberal ku pobernan mester sakrifiká pa hasi rikunan mas i mas riku pa e ora ei bini algu di benefisio pa nan komo trahadó . Frente Amplio Gobernashon Propio ta e unidat nobo pa guia e lucha pa krea rèspèt pa Kòrsou i pa e yu di Kòrsou.