‘Rusia lo hasi tur loke ta posibel pa apoyá gobièrnu legítimo di Maduro’

114
Peskov, kende a indiká ku lo para tras di Venezuela i Maduro.
CARACAS – E minister di Eksterior di Rusia, Serguéi Lavrov, a anunsiá den oranan di ayera ku Mòsku, huntu ku otro miembronan di komunidat internashonal, lo hasi tur loke ku ta posibel pa asina apoyá e gobièrnu legítimo di e presidente Nicolas Maduro den defensa di e Konstitushon venezolano.

Segun Lavrov a sigui indiká, Estádos Unídos a pone su mes pa kambia di forma ilegal, e gobièrnu konstitushonal venezolano. Sinembargo, esaki no ta impedí e nesesidat di defendé e derechi internashonal pa tur medionan ku ta posibel.

Mas aleu a indiká ku ta preokupá pa loke Estádos Unídos ta hasiendo i tambe su aliadonan, relashoná ku Venezuela, violando tur normanan di derechi internashonal.E palabranan di e minister a keda produsí mei mei di un seri di deklarashonnan for di Washington, apoyando e opositor Juan Guaidó, ku siman pasá a outo proklamá su mes komo e presidente enkargá di Venezuela.

Di su banda, e bosero presidensial di Rusia, Dmitri Peskov, a komuniká ku Mòsku lo defendé su interesnan den koperashon ku Venezuela pa ku e parti di derechi internashonal. Di e forma aki Peskov a referí na e sanshonnan imponé pa Estádos Unídos kontra PDVSA.Den mesun Peskov ademas a rekordá ku Caracas ya a kalifiká e sanshonnan estadounidense di ta ilegal i ku Mòsku ta kompartí e punto di bista aki.